Менск стаў пятым па ліку горадам у Эўропе, дзе была разгорнутая гэтая экспазыцыя, у якой прадстаўлены лепшыя 66 здымкаў, зробленыя цягам 2015 году.
Летась на конкурс было даслана каля 80 тысяч здымкаў ад амаль 6 тысяч аўтараў са 128 краінаў сьвету. У тым ліку за перамогу ў конкурсе змагаліся і 25 фотакарэспандэнтаў зь Беларусі.
Конкурс ладзіць World Press Photo Foundation, але на выяўленьне пераможцаў яна ня мае ўплыву. Лепшых называе міжнароднае журы, якое зьмяняецца штогод.
Пераможцы вызначаюцца ў некалькіх катэгорыях, сярод якіх «Прырода», «Штодзённасьць», «Спорт», «Гарачыя навіны» і г.д.
Пераможцы World Press Photo:
Пераможцы World Press Photo: Здымкам году стала фота ўцекачоў
Фотагалерэя ў вялікім памеры тут
Калі ж меркаваць па выстаўленай у Менску экспазыцыі, галоўную ўвагу фатографы сьвету ў 2015 годзе надавалі тэме міграцыі і падзеям у Сырыі. А на другое месца, паводле колькасьці пададзеных на конкурс прац, выйшла тэма экалёгіі.
Наогул па выніках мінулага году журы прысудзіла прызы ў васьмі намінацыях, у ліку пераможцаў — 41 фатограф з 21 краіны.
Галоўны прыз у намінацыі «Фатаграфія году» быў аддадзены аўстралійцу Ўорэну Рычардсану.
Выставу ў Менску прадстаўляў адзін з трох яе куратараў Лоўрэнс Кортэвэг з Галяндыі, які падчас прэсавай канфэрэнцыі агучыў галоўную мэту конкурсу: паказ жыцьця такім, якім яно ёсьць. Гэта не заўсёды і не паўсюль сустракае разуменьне.
Паводле словаў Лоўрэнса, сёлета арганізатары выставы адмовіліся паказваць яе ў Турэччыне, бо на здымку аднаго зь пераможцаў ёсьць выява палітыка, які ў Турэччыне карыстаецца неадназначным прызнаньнем. Гэта магло зрабіцца перашкодай да паказу ўсёй калекцыі і выклікаць патрабаваньні карэкціроўкі экспазыцыі.
«Самацэнзура зьяўляецца для нас рэччу непрымальнай», — цьвердзіў Лоўрэнс Кортэвэг у Менску. Адабраныя для паказу працы пераможцаў не зьмяняюцца ў залежнасьці ад паказу ў той ці іншай краіны за вельмі нязначнымі выняткамі — патлумачыў куратар World Press Photo.
Конкурс World Press Photo праводзіцца з 1955 году, а лепшыя ягоныя здымкі паказваюцца ў Менску трэці год запар. Экспазыцыя на Кастрычніцкай будзе працаваць да 24 траўня.
