У Маскву даставілі цела загінулага пад Пальмірай афіцэра расейскага спэцназу Аляксандра Прахарэнка.
Яго пахаваньне пройдзе 6 траўня на радзіме ў Арэнбурскай вобласьці, паведамляе ТАСС.
Як заяўляюць расейскія ўлады, старшы лейтэнант Прахарэнка загінуў пры выкананьні баявой задачы па навядзеньні ўдараў расейскіх самалётаў па баевіках «Ісламскай дзяржавы» ў правінцыі Хомс. Паводле афіцыйнай вэрсіі, трапіўшы ў акружэньне, афіцэр выклікаў агонь на сябе.
Прахарэнка пасьмяротна прысвоена званьне Героя Расеі, а ўлады Арэнбургу прынялі рашэньне назваць адну з вуліц горада яго імем.
Гібель Прахарэнка стала шостай афіцыйна пацьверджанай стратай Расеі ў Сырыі.