Такія дзеяньні дзяржаўнай службы міграцыі Кіргізстану на тэрыторыі «часова акупаванага Крыма» зьяўляюцца «недружалюбнымі» і «супярэчаць кіргіска-украінскім партнэрскім адносінам», заявілі ў амбасадзе Ўкраіны ў Бішкеку.
У заяве дыппрадстаўніцтва гаворыцца, што Ялта знаходзіцца на тэрыторыі, «якая зьяўляецца неад’емнай часткай Украіны», а такога роду дамовы могуць быць выкарыстаны як адзін з крокаў да міжнароднай «легітымізацыі» Крымскага паўвострава ў складзе Расеі.
«Увесь сьвет не прызнае Крым расейскай тэрыторыяй, і да гэтага часу кіргіскі ўрад таксама прытрымліваўся прызнаньня тэрытарыяльнай цэласнасьці Ўкраіны», — сказаў амбасадар Украіны ў Кіргізстане Мікалай Дарашэнка сайту Zanoza.kg.
Паводле дыплямата, кіргіскія ўлады пакуль не адказалі на ноту амбасады, а ўсе спробы сустрэцца з кіраўніком Дзяржаўнай службы міграцыі не ўвянчаліся посьпехам.
У сваёй заяве ўкраінская амбасада нагадала, што замежнікі могуць легальна патрапіць у Крым толькі з дазволу профільнага ўкраінскага дзяржаўнага органа і праз кантрольна-прапускныя пункты на сухапутнай мяжы Крыму і Ўкраіны.
«Парушальнікі парадку ўезду на часова акупаваную тэрыторыю Ўкраіны і выезду зь яе прыцягваюцца да адказнасьці ў адпаведнасьці з заканадаўствам Украіны», — гаворыцца ў заяве ўкраінскага боку.
Дзяржслужба па міграцыі Кіргізстану 21 красавіка паведаміла пра дасягнутую дамоўленасьць па працаўладкаваньні 500 кіргізстанцаў у гатэлі «Ялта-Інтурыст» у крымскім горадзе Ялта.
Кіргіскім грамадзянам прапануецца працаваць у якасьці пакаёвак, кухонных рабочых, прыбіральшчыкаў і афіцыянтаў з акладаў у 20 тысяч расейскіх рублёў у месяц.
Дадзеная мера, гаворыцца ў паведамленьні ведамства, накіравана на працаўладкаваньне кіргіскіх грамадзянаў у сувязі са зьніжэньнем попыту на замежную рабочую сілу ў сфэры турыстычнай індустрыі Турэччыны.
Украіна абурылася пагадненьнем кіргіскіх уладаў з адным з гатэляў на Крымскай паўвыспе аб працаўладкаваньні 500 кіргізстанцаў.
Яшчэ на гэтую тэму
Самае папулярнае
1