У цэнтры Санкт-Пецярбурга прайшла акцыя пратэсту, удзельнікі якой патрабавалі адстаўкі прэзыдэнта Расеі Ўладзімера Пуціна з-за скандалу з панамскімі афшорамі.
Акцыю правялі сябры моладзевага руху «Вясна». Пратэстоўцы выказвалі свае патрабаваньні ў адзіночных пікетах, не выкарыстоўвалі сымболікі і сьцягоў і выкарыстоўвалі эзопаву мову.
На іх плякатах было напісана «Пуцін хелло», «Слова дня: Адстаўка», «Вазьму ўрокі гульні на віялянчэлі тэрмінова», у баку на лавачцы ляжаў плякат «Расея бяз Пуціна», паведамляе ВВС.
Некаторыя апранулі футболкі зь перакрэсьленай выявай прэзыдэнта Расеі і з надпісам «Пуціну ня трэба часу, яму патрэбен тэрмін».
Дадзеныя пікетоўцаў тут жа перапісвала паліцыя.
Калі пікетоўцы паднялі ўверх пустыя аркушы замест плякатаў, паліцыя папярэдзіла, што за ўдзел у несанкцыянаванай акцыі будуць затрыманьні.
