Лінкі ўнівэрсальнага доступу

Журналіст Сямашка пасьля інтэрвію для Свабоды страціў працу на «Спутніку»


Васіль Сямашка і Ганна Іванова па дарозе ў Данецк на тэрыторыі Расеі, Растоўская вобласьць
Васіль Сямашка і Ганна Іванова па дарозе ў Данецк на тэрыторыі Расеі, Растоўская вобласьць

У менскім офісе расейскага рэсурсу «Спутнік» кажуць, што Васіль Сямашка ў іх стала і не працаваў, а быў толькі пазаштатным аўтарам.

Пасьля публікацыі на сайце Свабоды інтэрвію зь менскім журналістам Васілём Сямашкам пра ягоную паездку на акупаваную частку Данбасу пад назвай «У ДНР людзей катуюць? А ў менскай міліцыі людзей не катуюць?» у Васіля зьявіліся непрыемнасьці.

«Пасьля таго як Радыё Свабода апублікавала са мной інтэрвію, мяне звольнілі зь беларускага „Спутника“, — паведаміў сам Сямашка ў Фэйсбуку. — Нейкіх забаронаў даваць інтэрвію ў дамове, на падставе якой я там працаваў, не існуе. Інфармацыя, якую я даў у інтэрвію, не зьняпраўджаная, ніякіх таямніц я не выдаваў, нікога не абразіў. Прычына звальненьня, якую я пачуў, — гэта тое, што ў інтэрвію са мной Радыё Свабода ўзгадала „Спутнік“, а гэта ёсьць дрэнна. Цяпер я шукаю працу».

Кіраўнік расейскага інфармацыйнага рэсурсу «Спутник» у Менску Андрэй Качура гэтак пракамэнтаваў Свабодзе заяву журналіста:

«У нас Васіль ніколі ня быў у штаце, і я яго не мог звольніць фізычна. Наколькі я ведаю, ён супрацоўнічае і з Радыё Свабода, і ягоных матэрыялаў на Свабодзе ёсьць больш, чым на „Спутнику“, але ж вы не называеце яго сваім карэспандэнтам? Да прыкладу, апошні матэрыял, прысьвечаны Данбасу, ён апублікаваў на Свабодзе, там і фатаздымкі ягоныя, але сваім карэспандэнтам вы яго не называеце. Я хацеў бы паглядзець загаловак, што карэспандэнт Свабоды возіць дабрачынную дапамогу на Данбас.

Мы па праўдзе кажам: вельмі шырокае кола карэспандэнтаў прыцягваем да супрацоўніцтва. У нас ня толькі Васіль публікуецца, у нас публікуюцца многія беларускія журналісты. Так, сапраўды, мы зь ім супрацоўнічалі і ён у нас апублікаваў шэраг матэрыялаў. Але Васіль у нас у штаце ніколі ня быў. І калі палічыць тую колькасьць матэрыялаў, якія ён апублікаваў на іншых рэсурсах, то называць яго карэспандэнтам „Спутника“, я думаю, будзе няправільна. Свой ганарар ён атрымаў, і разьвіталіся мы зь ім узаемна ветліва — што ў гэтым трагічнага? Працоўную кніжку мы ў яго ня бралі, нікуды яго не адпраўлялі адмыслова. Мы ведалі, што ён сапраўды паехаў рыхтаваць матэрыялы, і скарысталіся такой магчымасьцю, апублікаваўшы адзін з гэтых матэрыялаў. Другі матэрыял апублікавалі вы, так што мы з вамі тут у аднолькавых умовах».

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG