Пэнтагон папрасіў Расею не атакаваць раёны на поўначы Сырыі ў мэтах бясьпекі дзеючых там амэрыканскіх сіл спэцыяльнага прызначэньня.
Падобны крок паказвае на пэўны ўзровень супрацоўніцтва, нягледзячы на заявы ваеннага ведамства ЗША аб адсутнасьці каардынацыі з Масквой.
Расея наносіць паветраныя ўдары па Сырыі з 30 верасьня.
Удары па тэрарыстах, якія знаходзяцца ў Сырыі і Іраку, таксама наносіць міжнародная кааліцыя, якую ўзначальвае ЗША.
Генэрал-лейтэнант Чарльз Браўн, адказны за апэрацыі ВПС у складзе Цэнтральнага камандаваньня ўзброеных сіл ЗША, заявіў у чацьвер у рамках тэлеканфэрэнцыі з журналістамі, што Маскву папрасілі не наносіць удары па геаграфічных зонах у Сырыі ў мэтах «забесьпячэньня ўзроўню бясьпекі» прыблізна 50 амэрыканскіх спэцназаўцаў, якія надаюць дапамогу мясцовым вайскоўцам у барацьбе з «Ісламскай дзяржавай».
«Гэта рэзонны запыт», — удакладніў прэс-сакратар Пэнтагона Пітэр Кук. Паводле яго слоў, Расея «пакуль выконвае» гэтую просьбу. Генэрал-лейтэнант Браўн дадаў, што Масква папрасіла антытэрарыстычную кааліцыю, якую ўзначальвае ЗША, устрымацца ад палётаў у паветраных прасторах над Сырыяй, дзе ў рамках апэрацыі лётаюць расейскія вайскоўцы.
«Звычайна мы там ня лётаем», — сказаў Браўн, дадаўшы, што гэта не складае праблемы.
ЗША ўзначальваюць антытэрарыстычную кааліцыю супраць баевікоў «Іламскай дзяржавы» ў Іраку і Сырыі зь сярэдзіны 2014 году.
У кастрычніку мінулага году Злучаныя Штаты і Расея падпісалі мэмарандум аб узаемаразуменьні па бясьпецы палётаў у Сырыі, накіраваны выключна на прадухіленьне сутыкненьняў амэрыканскіх і расейскіх самалётаў над Сырыяй. Прэс-сакратар Кук таксама распавёў аб просьбе Расеі не выдаваць дэталі пагадненьня аб палётах усіх відаў лятальных апаратаў, пілятуемых і бесьпілётных, у небе над Сырыяй.
