Лінкі ўнівэрсальнага доступу

Лёс папугаяў-нелегалаў, затрыманых памежнікамі, невядомы


Гісторыя пра 440 затрыманых беларускімі памежнікамі ў Лельчыцкім раёне папугаяў нагадвае дэтэктыў. Дзе цяпер знаходзяцца птушкі, якіх Лельчыцкая вэтэрынарная служба прызнала здаровымі, невядома.

38-гадовы жыхар Баранавічаў Алег Е. быў затрыманы 9 лютага ў памежнай зоне, на дарозе Глушкевічы — Мілошавічы. У аўтамабілі Opel ён перавозіў больш за 440 папугаяў, ня маючы на іх дакумэнтаў. У дачыненьні да перавозчыка птушак распачата праверка. А папугаі — амадзіны, хвалістыя папугаі, неразлучнікі, карэлы, разэлы — трапілі спачатку ў Лельчыцкую вэтэрынарную службу.

Адразу ж адгукнуліся эколягі, зоаабаронцы. Неабыякавая грамадзкасьць, валянтэры рыхтавалі клеткі, транспарт, дапамогу з далейшым разьмеркаваньнем птушак. Яны былі гатовыя дапамагчы і з адмысловым кормам для папугаяў.

Раніцай 12 лютага галоўны ўрач Лельчыцкай вэтэрынарнай службы Канстанцін Кудласевіч паведаміў экаабаронцам, што ўсе птушкі прызнаныя здаровымі і перададзеныя на часовае ўтрыманьне «гаспадару» — чалавеку, у якога і канфіскавалі птушак памежнікі — да вырашэньня юрыдычных пытаньняў, бо той паабяцаў прадставіць дакумэнты на «жывы тавар». Натуральна, птушак трэба карміць, даглядаць, і Алег Е. паабяцаў гэта рабіць.

Алег Е. паводзіць сябе дзіўна. У першай палове дня прадстаўнікам «Аховы птушак Бацькаўшчыны» ён казаў, што «маці проста выпусьціла птушак у вакно, і яны паляцелі», сябрам Беларускай партыі «Зялёныя» казаў, што папугаяў яму наагул не перадавалі. У другой палове пятніцы Алег Е. па тэлефоне ўжо не адказваў.

Калі птушак сапраўды «проста выпусьцілі», яны могуць загінуць на марозе. І тады вінаваты павінен быць пакараны за жорсткае абыходжаньне з жывёламі паводле артыкула 15.45 КаАП Рэспублікі Беларусь. Да таго ж амаль паўтысячы яркіх птушак на вуліцах Баранавічаў не заўважыць складана, гэта прыцягнула б увагу.

У чацьвер начальнік аддзелу біялягічнай разнастайнасьці Міністэрства прыродных рэсурсаў і аховы навакольнага асяродзьдзя Ксенія Панцялей паведаміла Свабодзе, што з тых відаў, якія пералічаныя ў прэс-рэлізе Памежнага камітэту, від папугая «разэла» падпадае пад дзеяньне СІТЭС — Канвэнцыі аб міжнародным гандлі відамі дзікай фаўны і флёры, якія знаходзяцца пад пагрозай зьнікненьня. Беларусь падпісала гэтую канвэнцыю, і функцыя Міністэрства — даць рэкамэндацыі, куды гэтых рэдкіх папугаяў лепш разьмясьціць. Мінпрыроды рэкамэндуе прынамсі папугаяў віду «разэла» перадаць у Менскі заапарк. Астатніх можна ўладкаваць у дзіцячыя дамы, школы, садкі.

Паводле прэсавага сакратара Дзяржаўнага памежнага камітэту Аляксандра Цішчанкі, перавозчык птушак парушыў памежнае, мытнае і вэтэрынарнае заканадаўства, перавозячы папугаяў без дакумэнтаў, у кардонных каробках, цісканіне. І павінен несьці за гэта адказнасьць.

Паўстае пытаньне: хто і на якой падставе перадаў папугаяў парушальніку заканадаўства, які вёз птушак кантрабандай? Хто цяпер адказвае за птушак — вэтэрынарная служба, памежнікі, іншыя інстанцыі? Дзе ўвогуле яны цяпер? Свабода будзе сачыць за лёсам 440 папугаяў.

Глядзець камэнтары (1)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG