Краіны Эўрапейскага Зьвязу павінны быць гатовыя да альтэрнатыўных плянаў ўмацаваньня межаў, пакуль Турэчына і Грэцыя не дамогуцца зьніжэньня хвалі ўцекачоў. Пра гэта заявілі прэм’ер-міністры Чэхіі Багуслаў Собатка і Славаччыны Робэрт Фіца.
Прэм’ер-міністр Чэхіі Багуслаў Собатка склікаў на 15 лютага пасяджэньне Вышаградзкай групы цэнтральнаэўрапейскіх краінаў за тры дні да саміту ЭЗ, які будзе вырашаць міграцыйны крызіс.
Чэская Рэспубліка, Славаччына, Вугоршчына і Польшча прынялі жорсткую пазыцыю па пытаньнях міграцыі і апынуліся ў канфрантацыі з заходнімі суседзямі ЭЗ у дачыненьні да прытоку мігрантаў, які дасягнуў 1 мільёна ў леташнім годзе.
Краіны ЭЗ наблізіліся да прыняцьця рашэньня аб прыпыненьні дзеяньня Шэнгенскай зоны, калі ня ўдасца спыніць колькасьць асобаў, якія шукаюць прытулку, галоўным чынам, з краінаў Блізкага Ўсходу і Афрыкі.
Больш за 40 тысяч чалавек прыбылі ў Грэцыю па моры з Турэччыны ў 2016 годзе, нягледзячы на пагадненьне з Анкарой у справе стрыманьня зыходу сірыйскіх уцекачоў. Собатка зазначыў, што Грэцыя «адмовілася» выконваць свае абавязкі.«Грэцыя ня ў стане забясьпечыць абарону мяжы», — сказаў Собатка на прэсавай канфэрэнцыі са славацкім калегам Робертам Фіца ў Браціславе. Яны падкрэсьлілі, што варта пачаць узгадненьне аднаўленьня сыстэмы памежнага кантролю, каб мець яе напагатове ў выпадку, калі міграцыя ня будзе кантралявацца Турэччынай альбо Грэцыяй.
Большасьць мігрантаў імкнуцца праехаць ў заможныя краіны ЭЗ, такія як Нямеччына, таму колькасьць тых, хто прыбывае ў краіны Цэнтральнай Эўропы, застаецца нізкай.
Краіны рэгіёну выказалі пратэст супраць сыстэмы квотаў у ЭЗ, прызначанай для пераразьмеркаваньня асоб, якія шукаюць прытулку, паміж дзяржавамі-членамі. Яны таксама падкрэсьлілі неабходнасьць больш строгай аховы мяжы ЭЗ і паскоранага ўвядзеньня сумеснага памежнага патруля. ЭЗ, як чакаецца, гатовы ўзгадніць дэталі новай сыстэмы аховы мяжы толькі ў чэрвені.
