Афіша
Менск — вечарына з нагоды 80-годзьдзя Васіля Сёмухі. Вядоўцы Лявон Баршчэўскі і Андрэй Хадановіч. У межах вечарыны — прэзэнтацыя перавыдання кнігі Фрыдрыха Ніцшэ «Так сказаў Заратустра» ў перакладзе Васіля Сёмухі. Кнігарня логвінаЎ (Незалежнасці 37а). Пачатак а 19-й.
У гісторыі:
1654 — Пераяслаўская рада прыняла рашэньне аб далучэньні Ўкраіны да Расеі.
1919 — пачалася мірная канфэрэнцыя ў Вэрсалі пасьля заканчэньня Першай сусьветнай вайны.
1921 — заснаванае Дзяржаўнае выдавецтва Беларусі.
1940 — указам Прэзыдыюму ВС БССР у Беластоцкай, Баранавіцкай, Берасьцейскай, Вялейскай і Пінскай абласьцях БССР замест паветаў утвораны 101 раён.
У памяці:
1882 — нарадзіўся Ёсіф Лангбард, архітэктар, аўтар праектаў будынкаў Дому ўраду, Акадэміі навук, Опэрнага тэатру ў Менску, Дому саветаў у Магілёве.
1912 — нарадзіўся Пётра Сыч, пісьменьнік, удзельнік баёў пад Монтэ-Касіна, адзін зь першых супрацоўнікаў Радыё Свабода.
1936 — нарадзіўся Васіль Сёмуха, беларускі перакладчык.
1984 — памер Панцеляймон Панамарэнка, кіраўнік савецкай Беларусі.
2011 — памер Віталь Тарас, беларускі публіцыст, супрацоўнік Радыё Свабода.
Цытата:
Нараджэнца СССР заўсёды лёгка вылічыць у натоўпе ў Эўропе па насьцярожанасьці позірку і пэўнай здранцьвеласьці рухаў. Чым больш ён стараецца не вылучацца з натоўпу і паводзіць сябе натуральна, раскавана, тым больш кідаецца ў вочы, што ён — чужы сярод чужых. Але ёсьць адрозьненьні. Украінцы амаль заўсёды размаўляюць на сваёй роднай мове. Беларусы — амаль ніколі. Часьцей за ўсё яны проста маўчаць.
Віталь Тарас