Лінкі ўнівэрсальнага доступу

Фільм пра Майдан намінаваны на «Оскар»


Стужка «Зіма ў агні» вытворчасьці Netflix можа быць прызнаная найлепшым дакумэнтальным фільмам.

«Зіма ў агні: бітва Ўкраіны за свабоду» інтэрнэт-ТВ-сэрвісу Netflix, супольнай вытворчасьці Вялікабрытаніі, ЗША і Ўкраіны вылучаная на 88-ю прэмію «Оскар» у намінацыі «лепшы поўнамэтражны дакумэнтальны фільм». Рэжысэр фільма — ізраільцянін Яўген Афінееўскі.

Пэўны час пасьля прэм’еры фільм быў дасяжны для бясплатнага прагляду ў інтэрнэце, але напярэдадні абвяшчэньня намінантаў на «Оскар» пірацкія копіі зьніклі з шырокага доступу.

Супернікамі «Зімы ў агні» ў намінацыі сталі «Погляд цішыні» пра генацыд у Інданэзіі ў 1965-1966 гадах, «Зямля картэляў» пра народнае змаганьне з мэксыканскімі наркакартэлямі, «Што здарылася, міс Сімон?», прысьвечаны сьпявачцы Ніне Сімон, і «Эмі» пра сьпявачку Эмі Ўайнхаўс.

Прэм’ера фільма адбылася на Вэнэцыянскім кінафэстывалі ў верасьні таго ж году. «Зіма ў агні» стала дасяжнай для прагляду на Netflix 9 кастрычніка 2015 году. Фільм прысьвечаны 93 дням процістаяньня на Майдане незалежнасьці ў Кіеве ў 2013-2014 гадах, у ім паказваюцца інтэрвію з удзельнікамі падзеяў і архіўныя кадры. Аўтары абяцалі «шырокамаштабны» погляд на падзеі і нават інтэрвію з 12-гадовым валянтэрам, «кінэматаграфічны хваласьпеў гераізму, духу і рашучасьці ўкраінскага народу».

Падзеям на Эўрамайдане прысьвячалі нямала кароткіх і доўгіх дакумэнтальных фільмаў, але «Зіма ў агні» стала першым маштабным заходнім праектам на гэтую тэму. Акрамя фільмаў, падзеям зімы 2013-2014 гадоў нямала песень прысьвяцілі музыкі — ад Украіны да Вялікабрытаніі.

14 студзеня былі вызначаныя і прэтэндэнты на «Оскар» у іншых намінацыях. Напрыклад, «Вяртанец з таго сьвету» (The Revenant) мэксыканскага рэжысэра Алехандра Гансалеса Іньярыту зь Леанарда Ды Капрыё вылучаны на адразу 12 намінацыяў.

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG