Лінкі ўнівэрсальнага доступу

Беларускім кампаніям нагадалі, што карыстацца трэба ліцэнзійнай Windows


Ад вясны 2015 году барацьба зь пірацтвам у Беларусі ўвайшла ў актыўную фазу. Па кампаніях праводзяць рэйды, выпісваюць штрафы.

Карпарацыя Microsoft ад пачатку зімы рассылае беларускім прадпрыемствам лісты з напамінам пра неабходнасьць карыстацца ліцэнзійнай вэрсіяй Windows.

«У сувязі з усё больш частымі выпадкамі праверак і арыштаў пэрсанальных кампутараў гэтым лістом мы хацелі зьвярнуць вашу ўвагу на неабходнасьць ліцэнзіяваньня апэрацыйнай сыстэмы Windows, усталяванай на пэрсанальных кампутарах вашай арганізацыі», — пішуць у лісьце і нагадваюць, дзе шукаць сэртыфікаты сапраўднасьці легальных вэрсіяў Windows, а таксама — як набыць сэртыфікаты на ўжо ўсталяваныя копіі Windows.

Таксама ў лісьце нагадваюць пра магчымасьць бясплатнага абнаўленьня да Windows 10 для ліцэнзійных вэрсіяў «сямёркі» і «васьмёркі» (Windows XP ужо не падтрымліваецца кампаніяй, бясплатнага абнаўленьня зь яе на «дзясятку» не прапануецца).

Узровень пірацтва ў Беларусі складае 86%.

«Узровень пірацтва ў Беларусі складае 86%. Вы бачыце, што адбыліся рэйды з боку праваахоўных органаў, гэта сыстэматычная праца, — патлумачыў Радыё Свабода Ўладзімер Грузьдзеў, рэгіянальны прадстаўнік Microsoft у Беларусі. — Таму наша задача — папярэдзіць, зьвярнуць увагу на неабходнасьць легалізацыі. Таму мы зрабілі комплексную рассылку па базе замоўцаў па Беларусі, тысячы кампаніяў атрымалі гэтыя лісты».

Упершыню ў Беларусі штраф за неліцэнзійную копію Windows быў выпісаны ў красавіку 2015 году. Тады за неліцэнзійныя Windows і Office розных вэрсіяў на 40 базавых велічыняў была аштрафаваная група кампаніяў «Родная старана», яшчэ на 22 базавыя велічыні — яе супрацоўнік, адказны за ІТ-інфраструктуру кампаніі. Пасьля рэйды і штрафы працягнуліся, дайшлі нават да такіх прадпрыемстваў, як Віцебскі алееэкстракцыйны завод.

Microsoft Windows — самая папулярная, але не адзіная ў сьвеце апэрацыйная сыстэма для настольных кампутараў. На канец 2015 году, паводле зьвестак statista.com, розныя вэрсіі Windows займалі амаль 85% рынку настольных апэрацыйных сыстэмаў (самая папулярная — Windows 7 з 47,5% рынку). Яшчэ амаль 10% мела MacOS X ад Apple, 1,5% — розныя вэрсіі вольнай апэрацыйнай сыстэмы Linux, бясплатнае выкарыстаньне якой распрацоўшчыкі толькі вітаюць.

Глядзець камэнтары (2)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG