Лінкі ўнівэрсальнага доступу

«Улада можа пайсьці насустрач прадпрымальнікам, але ня хоча», — голас народу


У Беларусі апусьцелі рэчавыя рынкі: прадпрымальнікі не змаглі дамовіцца з уладамі і масава згортваюць гандаль. Як да гэтага ставяцца пакупнікі і самі прадпрымальнікі? Карэспандэнтка Радыё Свабода пагутарыла з народам каля сталічнага гандлёвага цэнтру «Атлянтык», бальшыня гандлёвых павільёнаў якога пазакрываліся.

пачакайце

No media source currently available

0:00 0:03:30 0:00
Наўпроставы лінк

— Нядобра гэта. Не хапае тавараў. Павялічыцца колькасьць беспрацоўных. Мабыць, чыноўнікі нешта не дадумалі.

— Вельмі дрэнна гэта. На рынках нічога не купіць. Зараз да Раства трэба набываць падарункі. Усё зачынена, мне гэта не падабаецца.

— А на рынках усё таньнейшае было, чым у крамах?

— Канечне! Істотна таньнейшае, чым у крамах.

— Я лічу, што гэта вельмі дрэнна, таму што прадпрымальнікі мелі працу, людзі плацілі падаткі. А зараз — ні дзяржаве падаткаў, ні людзям тавараў.

— На рынках, у гандлёвых цэнтрах выбар быў большы, чым ва ўнівэрмагах. Да прыкладу, прыйдзеш паглядзець нейкую сукенку — навешана ўсяго, руку не прасунуць, а рэчы «адстойныя» як моладзь кажа. Ходзіш, заціснуўшы 2 мільёны ў руках, а купіць няма чаго. А тут можна нешта прыстойнае знайсьці. Канечне, шкада, што зачыняюцца нашы рынкі. Да таго ж прадпрымальнікі страцілі працу. Яны ж самі езьдзілі па тавар. А цяпер нам прапануюць: едзьце ў Расею, на «Чэркізон», купляйце там.

— Вельмі дрэнна, што рынкі закрываюцца. Мне падаецца, павінен быць выбар у людзей.

— Апусьцелі гандлёвыя рады на рынках, не дамовіліся прадпрымальнікі з уладамі. Прадпрымальнікі страцілі працу. Як вы да гэтага ставіцеся?

— Трэба дамаўляцца з уладамі, шукаць кампраміс. Трэба як мага хутчэй дамаўляцца.

— У некаторых прадпрымальнікаў нармальныя кошты, а ў некаторых — накручаныя ў два-тры разы. Вось такая ж куртка, як у мяне, у «Паркінгу» будзе каштаваць у два разы даражэй.

— Колькі можна дамаўляцца? Ужо быццам бы пра ўсё дамовіліся, зьнялі пытаньні з арэндай, А цяпер вось з сэртыфікацыяй. Быццам бы таксама спачатку ўрэгулявалі, аказваецца — не.

— Дакумэнты не зрабілі, дык вось іх і закрылі. У гэтым ёсьць і станоўчае, і адмоўнае. Можа, ня будзе самага няякаснага тавару, таму што ёсьць на рынках такі тавар, на які брыдка глядзець, ня тое што ўявіць у сваім гардэробе. Хацелася б, каб на дзіцячыя тавары былі сэртыфікаты гігіенічныя.

— Мне іх вельмі шкада. Яны стаяць на марозе, у непагоду — бедныя цётачкі! Апошнім часам мала што і куплялі ў іх, таму што ў народу грошай няма. Але было крыху лягчэй — і ім, бо ў іх праца была, і нам — маглі нешта таньней купіць. Таму што тыя ж штаны на рынку былі ў паўтара-два разы таньнейшыя, чым ва ўнівэрмагу. Так што вельмі дрэнна, што рынкі апусьцелі.

— Шкада, што прадпрымальнікі вымушаныя закрываць свае кропкі. Бо былі ў іх добрыя крамы, якія цяпер немагчыма знайсьці.

— Як вы думаеце, можа ўлада неяк пайсьці насустрач прадпрымальнікам, дамовіцца, пашукаць кампраміс?

— Канечне, улада можа пайсьці насустрач прадпрымальнікам, але ня хоча. Можа, але ня хоча.

— Я думала, што на двары мароз і таму рынкі не працуюць. Наагул усе зачыніліся? Як жах, што робіцца!

— Неяк занадта рэзка быў зьдзейсьнены гэты крок. Таму што не вырашаецца праблема ў прынцыпе. Вось я сама прадпрымальнік, працую з тканінамі. У Расеі многія тэкстыльныя фірмы даюць паперу, у якой напісана, што сэртыфікат не патрэбны, калі фабрыка выпускае пэўны сэртыфікат. А цяпер праблема, што трэба кожную тканіну сэртыфікаваць, адрэзаць кавалак, здаць кудысьці. Гэта такія стварае цяжкасьці! Калі ўжо з Расеяй мы браты, то трэба дамаўляцца, каб іхнія сэртыфікаты былі дзейныя і на нашай тэрыторыі. Тут трэба вырашаць дыфэрэнцыявана: калі гэта тавар дзіцячага асартымэнту, то патрэбны сэртыфікат. А калі тканіна дэкаратыўная, якая да цела не прылягае — не абавязковы сэртыфікат.

— Дрэнна, што людзі страцілі працу. Жыць жа трэба за штосьці!

— Канечне, вельмі дрэнна, што не даюць разьвівацца прадпрымальніцтву. Трэба ісьці хаця б па шляху Польшчы. Там усё без праблем. А ў нас выйшаў новы закон, які перашкаджае — што ў прадпрымальнікаў павінны быць адпаведныя дакумэнты. Гэта ж трэба было неяк вырашаць на ўзроўні ўраду, а не рабіць зьнянацку.

— Я лічу, што трэба гэтае пытаньне перагледзець. Таму што пакутуюць малазабясьпечаныя слаі насельніцтва. Можна было штосьці таньнейшае знайсьці, штосьці лепшае. Гэта перабор.

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG