Лінкі ўнівэрсальнага доступу

Telegram-ботаў навучылі віншаваць па-беларуску і дапамагаць беларускім аўтамабілістам


Адзін бот можа паказаць вашыя парушэньні і знайсьці бліжэйшыя запраўкі. Іншага бота тым часам можна папрасіць напісаць віншаваньне па-беларуску.

Для мэсэнджэра Паўла Дурава Telegram ад чэрвеня 2015 году стала можна распрацоўваць чат-ботаў — штучных суразмоўцаў, якія могуць выконваць карысныя функцыі па камандзе. Пра новага бота @belarusAutoBot для аўтааматараў Беларусі Свабодзе распавёў адзін зь яго аўтараў Віктар Суздальцаў:

«Бот умее інфармаваць аб парушэньнях па фотафіксацыі, як разава, гэтак і ў рэжыме рассылкі, апэратыўна паведамляць аб новым парушэньні, шукаць бліжэйшыя АЗС, СТА і аўтамыйкі, а таксама паведамляць пра чэргі на мяжы з дэманстрацыяй фота. Таксама зараз у тэставым рэжыме працуюць трансьляцыі RSS-стужак разьдзелаў, прысьвечаных аўтамабільный тэматыцы, зь беларускіх парталаў: Tut.by, Onliner.by і Abw.by».

Скрыншот перапіскі з ботам @belarusAutoBot
Скрыншот перапіскі з ботам @belarusAutoBot

На днях у Telegram зьявіўся і першы беларускамоўны бот. Мабільны апэратар velcom запусьціў беларускамоўнага бота @Vinshavatar — як паведамляе апэратар, каб разьдзяліць з усімі беларусамі сьветлы настрой і падарыць часьцінку радасьці напярэдадні Калядаў і Новага году. Боту трэба напісаць, каго вы хочаце павіншаваць, і той выдасьць тэкст з навагоднім віншаваньнем.

Каб скарыстацца ботамі, трэба спампаваць сам мэсэнджэр (ёсьць вэрсіі як для практычна любых тэлефонаў, так і для настольных кампутараў), скарыстацца пошукам і ў ім — увесьці назву бота: @BelarusAutoBot, @Vinshavatar альбо любога іншага.

Разам з тым у Telegram зьявіліся і сьвяточныя беларускамоўныя стыкеры-паштоўкі ад стваральнікаў «Віншаватара», іх можна спампаваць тут. Раней у Telegram зьяўляліся, напрыклад, стыкеры з кандыдатамі ў прэзыдэнты Аляксандрам Лукашэнкам і Тацянай Караткевіч.

Telegram адметны бясьпекай перапіскі — гэта адзін з тых мэсэнджэраў, у якіх паведамленьні карыстальнікаў зашыфраваныя і надзейна абароненыя ад зламысьнікаў і спэцслужбаў. Нядаўна былы супрацоўнік АНБ Эдвард Сноўдэн раскрытыкаваў праграму за тое, што налады па змоўчаньні ў ёй недастаткова бясьпечныя, Дураў жа адказаў, што карыстальнікам часьцей зручна мець сынхранізацыю паведамленьняў, а для тых, хто не давярае аўтарам праграмы, існуе функцыя «сакрэтных чатаў», да якіх нават самі аўтары праграмы ня могуць мець ніякага доступу.

Глядзець камэнтары (1)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG