Данецкі гарадзкі суд Растоўскай вобласьці Расеі да 16 красавіка 2016 падоўжыў тэрмін утрыманьня пад вартай ўкраінскай ваеннаслужачай Надзеі Саўчанкі. Такім чынам, судзьдзя задаволіў хадайніцтва пракурораў. У знак пратэсту супраць гэтага рашэньня Саўчанка заявіла пра намер з заўтрашняга дня пачаць галадоўку і запатрабавала неадкладнага вызваленьня.
У залі суду Саўчанка зьявілася з надпісам на сваёй футболцы: «Пытаньне да Пуціна. Калі вы адпусьціце ўкраінцаў, якіх выкралі і незаконна ўтрымліваеце ў расейскіх вязьніцах?».
Сёньня прэзыдэнт Расеі Ўладзімер Пуцін праводзіць прэсавую канфэрэнцыю, якая трансьлюецца вядучымі расейскімі тэлеканаламі. Падчас яе ён заявіў, што абмен зьняволенымі ў Расеі ўкраінцамі і расейцамі ва Ўкраіне, якіх іх краіны лічаць палітычнымі, можа быць зроблены паводле прынцыпу «ўсіх на ўсіх».
Саўчанка заявіла пра намер трымаць галадоўку да канца судовага працэсу.