Лінкі ўнівэрсальнага доступу

У Менску пройдуць суды за акцыю 24 лістапада


Вулічная акцыя, прымеркаваная да 19 гадавіны рэфэрэндуму 1996 году
Вулічная акцыя, прымеркаваная да 19 гадавіны рэфэрэндуму 1996 году

Чарговы адміністратыўны працэс супраць апазыцыянэраў за несанкцыянаваную акцыю пройдзе ў судзе Маскоўскага раёну Менску.

На 7 сьнежня ў Маскоўскі раённы суд Менску для разгляду адміністратыўных спраў «за ўдзел у несанкцыянаванай вулічнай акцыі», якая адбылася ў Менску 24 лістапада, выкліканыя кандыдат на прэзыдэнта на выбарах 2010 году Ўладзімер Някляеў, сустаршыня партыі БХД Павал Севярынец, а таксама назіральнікі праваабарончага цэнтру «Вясна» Натальля Сацункевіч і Сяргей Касьпяровіч.

Увечары 24 лістапада ў Менску на праспэкце Незалежнасьці адбылася вулічная акцыя, прымеркаваная да 19 гадавіны рэфэрэндуму 1996 году, які ў апазыцыі называюць пачаткам усталяваньня ў Беларусі дыктатуры Аляксандра Лукашэнкі. На акцыю на заклік былога кандыдата на прэзыдэнта, былога палітвязьня Мікалая Статкевіча прыйшлі вядомыя палітыкі, грамадзкія актывісты, простыя людзі — ўсяго больш за 100 чалавек.

Удзельнікі акцыі запалілі зьнічкі ў памяць пра палітыкаў Юрыя Захаранку і Віктара Ганчара, якія аднымі зь першых пратэставалі супраць рэфэрэндуму 1996 году і праз 3 гады зьніклі. Акцыя скончылася на прыступках Цэнтравыбаркаму, дзе на некаторых удзельнікаў акцыі міліцыянты склалі пратаколы. У тым ліку — на Мікалая Статкевіча, Ўладзімера Някляева, Паўла Севярынца, журналістаў Зьмітра Галко і Галіну Абакунчык, назіральнікаў зь «Вясны» Натальлю Сацункевіч і Сяргея Касьпяровіча. Пазьней прэсавая служба менскай гарадзкой міліцыі паведаміла, што журналістаў, якія працавалі на акцыі, да адміністрацыйнай адказнасьці прыцягваць ня будуць.

7 сьнежня Мікалай Статкевіч паведаміў карэспандэнту Свабоды, што позвы ў суд не атрымліваў. «Але калі б і атрымаў, не пайшоў бы», — дадаў палітык.

Уладзімер Някляеў выкліканы ў суд на 16 гадзінаў. «Позву даставіў у дом кур’ер, аддаў пад росьпіс. Неяк дзіўна напісана, што дастаўлена праз „гібрыдную пошту“ — што гэта за новаўвядзеньне, мне невядома. А вось СМС гэтым разам не было», — паведаміў Уладзімер Някляеў, які зьбіраецца прыйсьці ў суд.

Назіральнікаў зь «Вясны» Натальлю Сацункевіч і Сяргея Касьпяровіча выклікалі ў суд праз СМС на 15.00 і 16.00.

Абсэрваторыя па абароне праваабаронцаў ужо выступіла з заявай, у якой рашуча асудзіла адміністрацыйны перасьлед назіральнікаў Натальлі Сацункевіч і Сяргея Касьпяровіча.

Павал Севярынец выкліканы ў суд на 17.00. Палітык сказаў, што на працэс прыйдзе.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG