Лінкі ўнівэрсальнага доступу

Чыноўнікі прапануюць ініцыятарам пэтыцыі далучыцца да вырашэньня праблемы


Інтэрнэт-пляцоўка petitions.by, пры дапамозе якой жыхарам Беларусі прапануецца больш актыўна рэалізоўваць сваё права на ўдзел у кіраваньні сваёй мясцовасьцю праз звароты ў дзяржаўныя органы, вымушае чыноўнікаў усё больш актыўна лічыцца з меркаваньнем грамадзянаў.

Днямі ініцыятары звароту ў прадпрыемства «Мінсктранс» і дзяржаўную ўстанову «Сталічны транспарт і сувязь» атрымалі разгорнуты адказ на пералік прэтэнзіяў да арганізацыі транспартных зносінаў. У пэтыцыі падпісанты зьвярталі ўвагу на наступныя праблемы:

«Транспартная сыстэма Менска не адпавядае прынцыпу інтэрмадальнасьці — насуперак неаднаразова заяўленым спэцыялістамі транспартнай галіны курсу на стварэньне менавіта такой мадэлі. Гараджане часта сутыкаюцца з такой сытуацыяй: на прыпынку спыняецца некалькі аўтобусаў, кожны зь якіх едзе па зьвілістым маршруце, умоўна кажучы, праз паўгорада. Едзе доўга і ходзіць рэдка. Людзі вымушаныя карыстацца такімі маршрутамі для далёкіх дыяметральных і колавых паездак з-за аддаленых магістральных маршрутаў — такіх, як лініі мэтро. Гэта пазбаўляе сыстэмнасьці транспартную сетку горада.

Недахоп магістральных ліній зносінаў, аддаленасьць хуткага і зручнага транспарту выклікае перагружанасьць ліній мэтро, прымушае гараджанаў адмаўляцца ад грамадзкага транспарту на карысьць асабістага аўтамабіля, што выклікае зьвязаныя з аўтамабілізацыяй ня толькі транспартныя, але і сацыяльныя, экалягічныя праблемы.

Інтэрмадальная сыстэма мае на ўвазе наяўнасьць магістральных, экспрэсных маршрутаў з кароткім інтэрвалам руху (блізкім да інтэрвалу мэтро), якія пралягаюць, улічваючы спэцыфіку Менска, па дыямэтральных (або радыяльных) і колавых маршрутах. Прыпынкі такіх маршрутаў павінны стаць перасадачнымі вузламі, аналягічнымі прыпынкам мэтро».

Ініцыятары звароту ў дзяржаўныя інстанцыі перакананыя: дапаўненьне існуючых ліній мэтро сеткай наземнага хуткаснага транспарту ажывіць транспартную сыстэму сталіцы, паслужыць фактарам, які дэстымулюе аўтамабілекарыстаньне, што аблегчыць рашэньне шэрагу спадарожных праблемаў. З улікам акрэсьленай праблемы перамяшчэньня па колавых напрамках і немагчымасьць цалкам забясьпечыць патрэбы горада магутнасьцямі мэтрапалітэну, бачыцца актуальным стварэньне колавога экспрэснага аўтобуснага маршруту па другім транспартным кальцы з кароткімі інтэрваламі і рэдкімі прыпынкамі на ўсім працягу паездкі. Гэтаксама яны лічаць, што наспела неабходнасьць стварэньня такога ж маршруту на адрэзках першага і трэцяга транспартных кольцаў Менскай кальцавой дарогі ў мікрараёны Сухарава, Серабранка, Лошыца і іншых.

«Неабходна адзначыць, што ў разьвітых краінах гэтую функцыю пасьпяхова выконвае лёгкі рэйкавы транспарт ці трамвай, прыведзены ў адпаведнасьць да сучасных патрабаваньняў. У нашым выпадку з прычыны сыстэмных праблемаў з гэтым відам транспарту і, мяркуючы па ўсім, недастатковага фінансаваньня, першым крокам бачыцца стварэньне менавіта аўтобусных маршрутаў. Пры такім раскладзе інвэстыцыі мінімальныя, а ініцыятыва і адміністрацыйнае рашэньне зьяўляюцца самым важкім фактарам».

У лісьце, атрыманым зь дзяржаўнай установы «Сталічны транспарт і сувязь» за подпісам дырэктара Валерыя Шкуратава, ініцыятараў запэўніваюць: ад 2016 году плянуецца арганізаваць працу экспрэсных аўтобусных маршрутаў у якасьці экспэрымэнту. Пры гэтым заяўнікам прапануецца прыняць актыўны ўдзел у рэалізацыі праекту, прадставіўшы канкрэтныя прапановы па арганізацыі названых маршрутаў. Тэкст адказу прыкладаецца.

Глядзець камэнтары (1)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG