Паводле шэрагу расейскіх мэдыяў, у прыватнасьці парталу «Адкрытай Расеі», асноўны пункт, дзе зьбіраюцца вялікагрузныя аўтамабілі, якія будуць удзельнічаць у акцыі, знаходзіцца прыкладна за 30 кілямэтраў ад Масквы.
Кіроўцы чакаюць, што да іх далучацца калегі зь Пецярбургу і маюць намер чакаць іх на працягу 10-12 гадзін. Аднак, паліцыя рэгулярна зьвяртаецца да прысутных з просьбай «разьехацца», бо на адным месцы нібыта нельга доўга стаяць.
Падрабязнасьці заплянаванай акцыі не паведамляюцца. Незадаволенасьць кіроўцаў-«дальнабойнікаў» сыстэмай «Платон» праяўляецца з сярэдзіны лістапада ў выглядзе сходаў і мітынгаў.
Дзеяньне сыстэмы «Платон» распаўсюджваецца больш чым на 50 тысяч кілямэтраў расейскіх дарог. У жніўні 2014 году распараджэньнем ўраду Расеі было заключанае канцэсійнае пагадненьне паміж «уладальнікам» «Платона» — Фэдэральным дарожным агенцтвам і кампаніяй «РТ-Інвест Транспартныя сыстэмы» (РТІТС). Такім чынам, прыватная кампанія стала апэратарам сыстэмы. Адзін з галоўных акцыянэраў РТІТС — Ігар Ратэнбэрг, сын Аркадзя Ратэнбэрга, сябра прэзыдэнта Расеі Ўладзіміра Пуціна.