Лінкі ўнівэрсальнага доступу

У Каліфорніі падчас страляніны забітыя 14 чалавек


Страляніна адбылася каля Цэнтру сацыяльнай дапамогі ў акрузе Сан-Бэрнардына на поўдні штату. Паліцыя спрабуе абясшкодзіць аднаго або некалькіх узброеных злачынцаў.

У Сан-Бэрнардына, на поўдні Каліфорніі ў ЗША, у выніку страляніны, адкрытай невядомымі, забітыя прынамсі 14 чалавек, 17 чалавек параненыя. Страляніна адбылася паблізу Цэнтру сацыяльнай дапамогі. Гэтую інфармацыю тэлеканалу Fox-TV пацьвердзіла паліцыя.

Мужчына, які адкрыў страляніну, уцёк зь месца злачынства на пазадарожніку чорнага колеру. Пра гэта паведаміла са спасылкай на відавочцаў тэлекампанія СNN. У стралка, па некаторых зьвестках, было двое саўдзельнікаў.

Прэзыдэнт ЗША Барак Абама пацьвердзіў у сераду тэлеканалу СBS, што інцыдэнтам са стралянінай у акрузе Сан-Бэрнардына займаецца Фэдэральнае бюро расьсьледаваньняў. Паведамляецца, што ў выніку нападу таксама параненыя больш за 20 чалавек.

Паводле адной з вэрсіяў, злачынства адбылося падчас вечарыны, арганізаванай для дзяржаўных службоўцаў акругі. Як паведамляе агенцтва Reuters, для мерапрыемства была арандаваная канфэрэнц-заля, разьмешчаная ў корпусе № 3. У Цэнтры сацыяльнай дапамогі ўтрымліваюцца пацыенты з адхіленьнямі ў разумовым разьвіцьці. Дэпартамэнт шэрыфа акругі пацьвердзіў, што ўзброены мужчына (або некалькі ўзброеных мужчын) дзейнічалі ў раёне вуліц Орандж Шоў Роўд і Ўотэрмэн Авэню.

Раён ачапіла паліцыя, рух транспарту перакрыты. Ня выключана, што будынак можа быць замінаваны. На месцы здарэньня працуюць сапёры. Сан-Бэрнардына — горад з насельніцтвам прыкладна 200 тысяч чалавек — разьмешчаны ў ста кілямэтрах на ўсход ад Лос-Анджэлеса.

Права на свабоднае нашэнне зброі грамадзянам ЗША гарантуе другая папраўка да Канстытуцыі. На ініцыятыву Абамы ў 2012-2013 гадах быў распрацаваны пакет законапраектаў, які ўключаў у сябе скарачэньне колькасьці крам зброі, забарону на ўжываньне штурмавой зброі, ўзмацненьне жорсткасьці кантролю за абаротам агнястрэльных сродкаў. Аднак Сэнат ЗША адмовіўся прыняць гэтыя папраўкі.

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG