Кіраўнік Беларусі Аляксандр Лукашэнка атрымаў сэртыфікат аб тым, што ён зьяўляецца «Ганаровым Узьдзенем Дагестану». Паведамляецца, што сэртыфікат быў дадзены яму за жалезную волю, дальнабачную палітыку і прыклад патрыятызму і павагі да народаў СНД.
«Прысвойваючы вашаму лідэру высокае званьне, мы выказалі агульны настрой дагестанскага вольнага грамадзтва адзначыць яго асабісты ўнёсак у тое, што Беларусь стала ўзорам дружбы народаў і росквіту нацыянальных культур ня толькі ў Эўропе, але і ва ўсім сьвеце», — заявіў кіраўнік грамадзкай арганізацыі «Узьдзені Дагестану» Керымхан Умаханаў.
Узьдзень — гэта фэадальнае саслоўе на Каўказе. У Дагестане пад узьдзенямі разумелася шырокае саслоўе свабодных людзей, пасялян, якія жылі або самастойнымі сельскімі суполкамі, або знаходзіліся ў падпарадкаваньні розных валадароў на правах падданства, інфармуе агенцтва «Дагестан».