Лінкі ўнівэрсальнага доступу

Украінскі карыкатурыст: «Адчуваю, што Пуцін дагуляецца»


​Інтэрвію з украінскім мастаком, які стаў міжвольным суаўтарам адказу расейскай сэнатаркі Валянціны Пятрэнка часопісу Charlie Hebdo.

Украінскі мастак і музыка Юры Журавель стаў вядомы задоўга да таго, як яго карыкатуру на Віктара Януковіча запазычыла для свайго «мастацкага адказу» часопісу Charlie Hebdo расейская сэнатарка Валянціна Пятрэнка.

Ён стаў адным з самых вядомых мастакоў Майдану, выставу яго карыкатураў 24 лютага, у адзін з самых страшных дзён украінскай «рэвалюцыі годнасьці», разграміў і спаліў «Беркут».

Валянціна Пятрэнка
Валянціна Пятрэнка

Сваімі малюнкамі Журавель рэагуе ня толькі на ўкраінскія, але і на расейскія падзеі: у яго ёсьць карыкатуры і малюнкі, прысьвечаныя рэйтынгу Уладзіміра Пуціна, забойства Барыса Нямцова і акцыі Пятра Паўленскага каля будынка ФСБ на Лубянцы.

Мастак лічыць, што пабачыў ва ўчынку Пятрэнкі нейкі «падвох»:

«Я, шчыра кажучы, як убачыў сюжэт пра прэс-канфэрэнцыю, у мяне ўзьнікла адчуванне, што ў гэтым ёсць нейкі падвох, што нехта хоча зноў расхістаць сытуацыю ва Ўкраіне, зноў прыплесьці сюды Майдан. Таму што мы зараз супакоіліся. У мяне ў пад’езьдзе жывуць на адной пляцоўцы былы бандэравец, удзельнік УПА (Украінскай паўстанцкай арміі. — РС), і былы энкавэдэшнік. Яны разам выходзяць і п’юць піва, і ўсё нармальна. Дзяржава жыве мірным жыцьцём. Зразумела, на ўсходзе ў нас адбываецца бардак, мы адчуваем ўварваньне з боку Расеі, але людзі ўжо навучыліся жыць па-новаму і прыслухоўвацца да думак і меркаваньняў адно аднаго».

На пытаньне, каго б мастак зараз зьмясьціў у кацёл, Журавель кажа, што прадстаўнікоў цяперашняй улады:

«Я б з задавальненьнем у гэты кацёл зьмясьціў прадстаўнікоў цяперашняй улады, таму што на касьцях Майдану ва ўладу ўлезьлі людзі, якія не заслугоўваюць там знаходзіцца. Абяцаньні Парашэнкі не выконваюцца, людзі незадаволеныя і палітыкай Яцанюка, тое, што робіць у Кіеве Клічко, таксама нас не задавальняе. У любым выпадку, дзякуй Богу, ёсьць магчымасьці змагацца з гэтым, і я адчуваю, што мы... зноў вось прыходзіць канец восені, возьмемся за справу».

Карыкатуры Юрыя Жураўля актуальныя да гэтага часу. Яго малюнкам «Нябесная сотня» актывісты «апячаталі» ўваход у кавярню, якая адкрылася нядаўна ў цэнтры Кіева побач з Домам прафсаюзаў — гэта падзея выклікала пратэсты сярод тых, хто лічыць адкрыцьцё такой установы па суседзтву зь месцам трагічнай гібелі актывістаў Майдану недапушчальным.

У інтэрвію Радыё Свабода Юры Журавель адзначыў, што 90 працэнтаў «народнай падтрымкі» Пуціна насамрэч нічога ня значаць.

«Вы ж, напэўна, чулі пра Чаўшэску, у якога за два дні да расстрэлу быў вельмі высокі рэйтынг. Вера і любоў вельмі моцна мяжуюць зь нянавісьцю. Чалавеку рана ці позна прыходзіцца адказваць за свае словы. Але я проста адчуваю, ды я проста ведаю — ён дагуляецца. І чым больш праходзіць часу, тым больш расейцаў гэта разумеюць» — заявіў Юры Журавель

Юры Журавель — ня толькі мастак, але і музыка. Жартоўны кліп яго групы пад назвай «Накурыла баба жураўля» набраў на YouTube амаль мільён праглядаў. Акрамя гэтага, Журавель ўдзельнічае ў грамадзкай дзейнасьці ў родным Роўна, дзе ён стварыў арганізацыю «Дзеці падзямельля», якая займаецца ўладкаваньнем гарадзкой прасторы.

Глядзець камэнтары (2)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG