Лінкі ўнівэрсальнага доступу

Каміла Ляўчук, вучаніца ў майцы з «Пагоняй» у расейскамоўнай клясе


Дачка берасьцейскіх журналістаў Алеся Леўчука і Міланы Харытонавай Каміла наведвае 2 клясу ў расейскамоўнай школе. Адкрыць беларускую клясу для адной Камілы берасьцейскія ўлады адмовіліся.

Ужо другі год у Берасьці беларускамоўная дзяўчынка ходзіць у расейскую школу. У больш як 300-тысячным абласным цэнтры так не знайшлося яшчэ бацькоў, якія б пажадалі вучыць сваіх дзяцей па-беларуску.

Вучаніца другой клясы Каміла Ляўчук кажа, што ўжо звыклася да навучаньня ў расейскамоўнай клясе, але кажа, што «дрэнна вучыцца не па-беларуску»:

«Мне ня вельмі падабаецца вучыцца ў расейскай клясе, бо дзеці не разумеюць і мяне на ўроку беларускай мовы заўсёды дзёргаюць, пытаюць, «як гэта будзе, як гэта перакласьці...»

Каміла кажа, што яе любімы прадмет у школе — беларуская мова. А з настаўніцай фізкультуры дзяўчынка канфліктуе, кажа, што ёй не падабаецца, што фізручка шыхтуе дзяцей, як у войску.

Каміла з бацькамі
Каміла з бацькамі

У школу Каміла часта ходзіць у майцы з «Пагоняй». Кажа, што настаўнікі на гэта не пярэчаць, але іншыя дзеці кажуць, што «нельга такое апранаць, бо так настаўнікі сказалі».

Бацькі Камілы распавялі, што Каміла часам выступае з прэтэнзіямі ў школе — напрыклад, патрабавала дэсэртны нож у сталоўцы, каб намазаць масла на хлеб, бо яно проста ляжала на лусьце кавалкам. Дзіцяці адмовілі даць нож, сказаўшы, што няма, а потым Каміла заўважыла такія нажы ў руках настаўнікаў у той жа сталоўцы. Дзяўчынка шмат займаецца плаваньнем, наведвае палац водных відаў спорту, кажа яе маці Мілана:

«Яна ходзіць у басэйн, ёй вельмі падабаецца. Зараз яна ўжо ходзіць у групу ў цэнтры алімпійскага рэзэрву. Тры разы на тыдзень займаецца. Яна бачыла Аляксандру Герасіменю (двухразовая віцэ-чэмпіёнка Алімпійскіх гульняў па плаваньні, — РС), яна так Камілу натхніла. Каміла сказала Герасімені, што як падрасьце, паспрабуе яе перагнаць. Гэта вельмі файна, што ў нас у краіне ёсьць такія спартоўцы, якія могуць дзяцей натхніць займацца».

Каміла з татам Алесем і плыўчыхай Аляксандрай Герасіменяй
Каміла з татам Алесем і плыўчыхай Аляксандрай Герасіменяй

У сям’ю незалежных журналістаў прыходзіла нядаўна камісія сацыяльных пэдагогаў са школы — аглядаць умовы пражываньня дзіцяці. Бацькі Камілы ня выключаюць, што іх сям’ю ўключылі ў сьпіс нядобранадзейных, калі прыслалі гэтую камісію.

Алесь Ляўчук зьдзіўляецца, як можна лічыць іх сям’ю нядобранадзейнай, калі штогод яны з Камілай падарожнічаюць па іншых краінах:

«У гэтым годзе езьдзілі адпачываць у Польшчу на мора. І цяпер, на восеньскіх канікулах, на мой дзень народзінаў, таксама ў Польшчу езьдзілі, толькі вярнуліся. Шмат музэяў абышлі ды розных гістарычных мясьцінаў. Я пытаўся ў дзяцей у клясе Камілы, хто ўлетку езьдзіў у іншыя краіны. Толькі адна дзяўчынка падняла руку. Астатнія ж далей бабулінай вёскі нічога ня бачаць. Маё дзіця лепей за многіх апранаецца, а да нас прыходзіць гэтая камісія... Мы за басэйн для Камілы год плацілі 380 тысяч у месяц, я думаю, не кожная сям’я такое пацягне».

Каміла Ляўчук
Каміла Ляўчук

Спадар Ляўчук распавёў, што часта даводзіцца выступаць супраць пабораў у школе. Аднак такую ініцыятыву не падтрымліваюць іншыя бацькі:

«Мы заўсёды здаем грошы на патрэбы клясы, але скідвацца на тратуарную плітку ў школе — гэта ўжо перабор. Ёсьць упраўленьне адукацыі, няхай з гэтым і вырашаюць,» — кажа Алесь. «Бацькі проста баяцца пярэчыць, каб не зрабіць дзіцяці горш, калі настаўнікі яму будуць надаваць менш увагі. Яны баяцца не аддаць у які летнік, або не запісацца на нейкае харчаваньне, або ня здаць грошы. А як прапануеш: давайце дзяцей зводзім некуды ў музэй — то гэта дорага. А як 200 тысячаў на плітку — то калі ласка,» — кажа Мілана Харытонава.

Мілана кажа, што адчувае ад бацькоў іншых дзяцей пэўную нацягнутасьць у адносінах:

«Пасьля апошняга бацькоўскага сходу мяне адна маці нават у краме пабачыла, спыніла і пачала размаўляць, што ёй, маўляў, нас так шкада, што мы нечага хочам, змагаемся, што мы няправільна робім, калі адрываемся ад калектыву... Я слухала-слухала і так не зразумела, што яна хоча данесьці».

Каміла з маці Міланай
Каміла з маці Міланай

Незалежныя журналісты Мілана Харытонава і Алесь Ляўчук працуюць на інфармацыйнае агенцтва «БелаПАН». Тры разы Алеся прыцягвалі да адміністрацыйнай адказнасьці за супрацу зь «Белсатам» без акрэдытацыі МЗС Беларусі.

Глядзець камэнтары (13)

Гэтая дыскусія закрытая.
XS
SM
MD
LG