Вучэньні пройдуць на палігонах Беларусі і Расеі.
Пра гэта паведаміў у Маскве расейскі міністар абароны Сяргей Шайгу пасьля сумеснай калегіі міністэрстваў абароны дзьвюх краін.
Абодва бакі прааналізавалі вынікі вучэньняў «Шчыт Саюзу-2015», якія будуць улічаныя пры правядзеньні праз два гады вучэньняў «Захад-2017».
Паводле камандуючага войскамі Заходняй ваеннай акругі Расеі Анатоля Сідарава, акрамя ўдасканаленьня падрыхтоўкі арганізацыі ваеннага кіраваньня і войскаў, вучэньні «Захад-2017» будуць накіраваныя на шэраг практычных мэтаў. У іх ліку — удасканаленьне сыстэмы кіраваньня Рэгіянальнай групоўкай войскаў, удасканаленьне аб’яднаных сыстэмаў выведкі, радыёэлектроннай барацьбы, матэрыяльна-тэхнічнага і іншых відаў забесьпячэньня. Акрамя таго, адной з мэтаў вучэньняў стане павышэньне эфэктыўнасьці ўзаемадзеяньня ў Адзінай рэгіянальнай сыстэме супрацьпаветранай абароны, паведамляе БелТА.
