У Беларусі затрыманыя экс-начальнік упраўленьня па Маскоўскай вобласьці судовага дэпартамэнту пры Вярхоўным судзе РФ Валеры Кузьміч і яго намесьнік па фінансах Яўген Цітоў, якія былі ў міжнародным вышуку.
Пра гэта паведамляе «Коммерсант».
Чыноўнікаў абвінавачваюць у маштабных крадзяжах бюджэтных сродкаў, якія выдзяляліся на аплату паслуг перакладчыкаў. Шкода ацэньваецца ў 1,4 млрд. расейскіх рублёў. Сьляды выкрадзеных сродкаў былі выяўленыя ў Сынгапуры і на Кіпры.
Паводле «Коммерсанта», Валерыя Кузьміча і Яўгена Цітова затрымалі супрацоўнікі беларускага КДБ практычна адразу пасьля перасячэньня мяжы. Мабільныя тэлефоны, якімі карысталіся былыя чыноўнікі, праслухоўваліся расейскімі спэцслужбамі. Калі апошнім стала вядома пра тое, што Кузьміч і Цітоў маюць намер прыехаць для сустрэчы са сваякамі ў Беларусь, ФСБ паведаміла пра гэта ў беларускі КДБ. Паводле некаторых зьвестак, Валеры Кузьміч і Яўген Цітоў прыбылі ў Беларусь з Італіі, дзе жылі апошнім часам.