Забіты ў лютым у Маскве апазыцыйны палітык Барыс Нямцоў і ўкраінская лётчыца Надзея Саўчанка, якая знаходзіцца пад арыштам у Расеі, унесены ў сьпіс намінантаў на прэмію імя Андрэя Сахарава за 2015 год.
Узнагарода, заснаваная ў 1988 годзе Эўрапарлямэнтам, прысуджаецца штогод грамадзянам або іх аб’яднаньням за ўклад у абарону правоў чалавека і свабоды выказваньня. Грашовы памер прэміі складае 50 тысяч эўра.
Сярод іншых намінантаў гэтага году — былы кантрактнік амэрыканскіх спэцслужбаў Эдвард Сноўдэн, блогер з Саудаўскай Арабіі Раіф Бадаві, самалійская актывістка Эдна Адан Ісмаіл. Ляўрэата назавуць у кастрычніку.
Раней стала вядома, што Барыс Нямцоў пасьмяротна ўганараваны амэрыканскай Прэміяй Свабоды за 2015 год.
Зь Беларусі ўзнагароду імя Сахарава атрымлівалі Беларуская асацыяцыя журналістаў і Аляксандар Мілінкевіч.