Цела Алеся Чаркашына з Украіны даставілі ў Берасьце ноччу 3 верасьня.
На разьвітаньне з Алесем Чаркашыным сабралася каля сотні чалавек, у тым ліку шмат актывістаў БХД, «Маладога фронту». Сярод іх — Павал Севярынец, Зьміцер Дашкевіч, Наста Дашкевіч, Андрэй Кім і іншыя.
Калі прыехала машына зь целам, то сябры партыі БХД і маладафронтаўцы сталі на калені. Калі выносілі з машыны і раскрывалі труну, яны скандавалі: «Героі не ўміраюць!».
Пад гэтыя словы пачалося разьвітаньне, якое распачалі бацькі Алеся. Пазьней выступілі сьвятары. Хор сьпявае псальмы.
Труна Алеся пакрытая бела-чырвона-белым сьцягам. У грамадзе відаць бел-чырвона-белыя сьцягі і вянкі ў колерах украінскага сьцяга.
Былы старшыня берасцейскай гарадской арганізацыі БХД, 33-гадовы Алесь Чаркашын быў паранены ў баі пад Белакаменкай на Данбасе і памёр у шпіталі ў Запарожжы пасьля некалькіх тыдняў комы. Ён ваяваў пад пазыўным «Сябар Тарас» у тактычнай групе «Беларусь» у складзе Добраахвотнага ўкраінскага корпусу «Правага сэктару», быў капэлянам добраахвотнікаў.
Глядзець фотагалерэю цалкам тут
