Вярхоўны прадстаўнік Эўразьвязу па зьнешняй палітыцы Федэрыка Магерыні заклікала Расею вызваліць асуджанага да 15 гадоў турмы супрацоўніка эстонскай паліцыі бясьпекі Эстана Кохвэрта.
Кохвэрт быў прызнаны Пскоўскім абласной судом вінаватым у шпіянажы, кантрабандзе зброі і незаконным перасячэньні мяжы. Магэрыні назвала вынесены ў Расеі прысуд парушэньнем міжнароднага права — на слуханьнях забаранілі прысутнічаць эстонскаму консулу, а ў самога падсуднага, на яе думку, не было «адэкватнай юрыдычнай падтрымкі».
ФСБ Расеі затрымала Эстана Кохвэра ў верасьні мінулага году. Па зьвестках ведамства, пры затрыманьні ў яго канфіскавалі пісталет з патронамі, 5 тысяч эўра, тэхніку для патаемнага аўдыёзапісу, а таксама матэрыялы, якія маюць характар разьведвальнага заданьня. Сам Кохвэр віну не прызнае. У Таліне сьцьвярджаюць, што супрацоўнікі расейскіх спэцслужбаў затрымалі яго на эстонскім баку і празь мяжу даставілі ў Расею.
Сёньня суд прысудзіў Кохвэра да 15 гадоў пазбаўленьня волі з адбываньнем пакараньня ў калёніі строгага рэжыму, а таксама да штрафу ў 100 тысяч рублёў. Суд над ім праходзіў у закрытым рэжыме, паколькі справе быў нададзены грыф «сакрэтна».
