Па факце абстрэлу прадмесьцяў Марыюпалю пракуратура Данецкай вобласьці адкрыла вытворчасьць па артыкуле аб тэрарыстычным акце Крымінальнага кодэксу Ўкраіны.
«У ноч з 16 на 17 жніўня баевікі тэрарыстычнай арганізацыі „ДНР“ пачалі масіраваны абстрэл зь цяжкай артылерыі прадмесьцяў Марыюпалю Данецкай вобласьці. Так, пад абстрэл баевікоў патрапілі пасёлкі Сартана і Лебядзінскі» — гаворыцца ў паведамленьні ведамства.
«У выніку артылерыйскага абстрэлу два чалавекі — мужчына і маладая жанчына — загінулі, таксама атрымалі раненьні яшчэ шэсьць мірных жыхароў, сярод якіх 10-гадовае дзіця. Акрамя таго, у выніку абстрэлаў, ажыцьцёўленых тэрарыстамі, пашкоджана больш за 50 жылых дамоў і гаспадарчых памяшканьняў ды газаправод», — паведамілі ў пракуратуры.
Раней аб двух загінулых у выніку абстрэлаў навакольляў Марыюпалю паведамілі ў Міністэрстве ўнутраных справаў.
Сэпаратысты ў сваю чаргу абвінавачваюць праўрадавыя сілы АТО ў абстрэлах мірных населеных пунктаў на кантраляванай імі тэрыторыі Данбасу, у тым ліку Горлаўкі і навакольляў Данецку.
