Беларусь не адчувае ціску з боку краінаў Захаду ў сувязі з надыходзячымі ў кастрычніку прэзыдэнцкімі выбарамі, заявіў міністар замежных спраў краіны Уладзімер Макей у інтэрвію тэлеканалу ОНТ, паказаным у нядзелю ўвечары, як паведамляе Інтэрфакс.
«Ніхто ня ставіць нам умоваў у сувязі з правядзеньнем выбараў, і ніхто ня мае права ставіць нам умовы. Мы сувэрэнная краіна, мы праводзім выбары ў адпаведнасьці з нацыянальным заканадаўствам і міжнароднымі абавязацельствамі», — сказаў Макей.
Ён таксама выказаў перакананьне, што прэзыдэнцкія выбары ў Беларусі «пройдуць транспарэнтна, адкрыта, і праблемаў, зьвязаных з правядзеньнем гэтых выбараў, ня будзе».
Кіраўнік зьнешнепалітычнага ведамства адзначыў, што Беларусь па-ранейшаму гатовая да нармалізацыі адносінаў з Эўразьвязам.
«Мы зацікаўленыя ў тым, каб адносіны паміж Беларусьсю і Эўразьвязам нармалізаваліся. Я перакананы, што гэта рана ці позна адбудзецца, і гэта пойдзе на карысьць рэгіёну, і краіне ў цэлым, і нашым партнэрам», — заявіў Уладзімер Макей.
