У Спэцыяльнай маніторынгавай місіі АБСЭ паведамляюць аб падпале чатырох аўтамабіляў назіральнікаў гэтай ноччу ў Данецку.
«Гэтае начы ля офісу СММ ў Данецку 4 аўтамабілі АБСЭ былі зьнішчаныя, верагодна, у выніку падпалу. Місія асуджае такія дзеяньні», — гаворыцца ў паведамленьні СММ АБСЭ, апублікаваным у нядзелю, 9 жніўня, у Facebook.
Дэталі назіральнікі АБСЭ паабяцалі паведаміць пазьней.
У ліпені ў Данецку фарбай з балёнчыкаў былі размаляваныя 30 аўтамабіляў супрацоўнікаў місіі.
7 жніўня ў СММ АБСЭ паведамілі аб сур’ёзным росьце выпадкаў парушэньня рэжыму спыненьня агню ў раёне Данецкага аэрапорта.
Назіральнікі АБСЭ пакуль манітораць выкананьне менскіх дамоўленасьцяў, дасягнутых у лютым сёлета аб спыненьні агню на Данбасе.
Пагадненьні, дасягнутыя ў Менску ў лютым, прадугледжваюць спыненьне агню на ўсходзе Украіны, аднаўленьне кантролю за мяжой і адвод цяжкага ўзбраеньня. У той жа час баі ў Данбасе працягваюцца, бакі абвінавачваюць у парушэньні перамір’я адзін аднаго.
Баявыя дзеяньні на Данбасе працягваюцца з красавіка 2014 году. За гэты час, паводле ААН, там загінулі больш 6800 чалавек.