Лідэры краінаў эўразоны праводзяць сёньня ў Брусэлі тэрміновую сустрэчу па пытаньні даўгавога крызісу ў Грэцыі.
Краіне пагражае дэфолт, паколькі яна ня ў стане абслугоўваць свае даўгі з-за нежаданьня леварадыкальнага ўраду Алексіса Цыпраса пагадзіцца на меры жорсткай эканоміі ў абмен на працяг міжнароднай фінансавай дапамогі.
Перад самітам адбудзецца сустрэча Цыпраса з кіраўнікамі Міжнароднага валютнага фонду, ЭЗ і Эўрапейскага цэнтральнага банку, якія зьяўляюцца асноўнымі крэдыторамі Грэцыі.
У нядзелю Цыпрас прапанаваў новы пакет рэформаў — у спробе разблякаваць замежную фінансавую дапамогу і пазьбегнуць дэфолту. Паведамляецца, што аб новых прапановах прэм’ер праінфармаваў па тэлефоне канцлера ФРГ Ангелу Мэркель, прэзыдэнта Францыі Франсуа Алянда і кіраўніка Эўракамісіі Жан-Клода Юнкера.
У той жа дзень у Атэнах некалькі тысяч прыхільнікаў леварадыкальнай партыі Цыпраса «СІРЫЗА» правялі дэманстрацыю з патрабаваньнем не саступаць ціску міжнародных крэдытораў і ня ўводзіць меры жорсткай эканоміі дзеля атрыманьня фінансавай дапамогі.
Да канца чэрвеня Грэцыя павінна ажыцьцявіць ключавыя выплаты па крэдыце МВФ, на што грошай у яе пакуль няма.
