Пра гэта агенцтва «Інтэрфакс» паведамляе са спасылкай на кіраўніка фонду «Свабода інфармацыі» Івана Паўлава.
«Мы падалі заяву ў Вярхоўны суд супраць прэзыдэнцкага ўказу аб засакрэчваньні стратаў асабістага складу расейскіх Узброеных сіл. Мы лічым, што прэзыдэнт ня меў права засакрэчваць гэтую катэгорыю інфармацыі — гэта проста выходзіць за рамкі яго паўнамоцтваў. Справа ў тым, што абмяжоўваць доступ да інфармацыі можна толькі фэдэральным законам, але не падзаконнымі актамі, а ўказ — гэта менавіта падзаконны акт», — сказаў Паўлаў.
Паводле яго слоў, у падрыхтоўцы пазову прынялі ўдзел ня толькі юрысты, але і грамадзкія дзеячы і журналісты.
28 траўня на афіцыйным інтэрнэт-партале прававой інфармацыі Расеі зьявіўся ўказ прэзыдэнта Пуціна аб засакрэчваньнi зьвестак Міністэрства абароны пра страты ў «мірны час падчас правядзеньня спэцыяльных апэрацыяў». Раней дзяржаўнай таямніцай лічыліся зьвесткі пра страты арміі толькі падчас ваенных дзеяньняў.