Лінкі ўнівэрсальнага доступу

Лябедзька: Вы нам подпісы, мы вам — плятформу казаць пра свае праблемы


Анатоль Лябедзька

Анатоль Лябедзька абвясьціў пра пачатак сваёй прэзыдэнцкай кампаніі і прапанаваў статус даверанай асобы кандыдата наўзамен за 4 тысячы подпісаў.

Старшыня Аб’яднанай грамадзянскай партыі Анатоль Лябедзька заклікаў узяць удзел у ягонай перадвыбарчай кампаніі ўсіх, хто хоча рабіць на працягу месяца тое, што «забаронена ў звычайным нашым жыцьці».

«Мы зьвяртаемся да розных групаў, якія займаюцца і палітыкай, і сацыяльнай праблематыкай. Мы прапануем вам такі кантракт: вы зьбіраеце 4 тысячы подпісаў на карысьць рэгістрацыі Анатоля Лябедзькі, а мы даём вам мажлівасьць на працягу цэлага месяца рабіць, рэалізоўваць тое, што вам забаронена ў звычайным нашым жыцьці — рабіць праз інстытут даверанай асобы. Давераная асоба — гэта мажлівасьць на працягу цэлага месяца рабіць тое, што ў звычайнай нашай сытуацыі забаронена. Напрыклад, у нас ёсьць група перавозчыкаў, у якіх ёсьць праблемы з уладай, ім не даюць правесьці нейкую акцыю, кампанію. Калі ласка, вы — 4 тысячы подпісаў, адзін з вас становіцца даверанай асобай, і вы на працягу месяца па ўсіх рэгіёнах Беларусі можаце гаварыць пра сваю праблему», — кажа ён.

Паводле слоў Лябедзькі, такую прапанову АГП зробіць і аргкамітэту партыі Статкевіча, каб праз статус даверанай асобы яны маглі праводзіць кампанію за вызваленьне Мікалая Статкевіча.

Паводле слоў Лябедзькі, ён сёньня — адзіная рэальная альтэрнатыва існуючай уладзе.

«Так сталася не таму, што я самы-самы. Але на сёньняшні дзень менавіта я і мая каманда зьяўляюцца рэальнай альтэрнатывай таму, што ёсьць у Беларусі, — пры ўсёй павазе да ўсіх патэнцыйных удзельнікаў выбарчай кампаніі. Падкрэсьліваю — так склаліся абставіны. І мы гатовы браць на сябе гэтую адказнасьць, мы ня будзем гуляць па правілах улады, мы будзем працаваць па сваім сцэнары. Гэта пазытыўная эканамічная альтэрнатыва (праграма „Мільён новых працоўных месцаў“), і гэта ўсё, каб не дапусьціць легітымацыі вынікаў выбарчай кампаніі. Калі гэтага не зрабіць, то мы можам страціць краіну», — адзначыў палітык.

Лябедзька выказаў сумнеў, што ён будзе зарэгістраваны як кандыдат у прэзыдэнты. Але нават калі ён будзе зарэгістраваны, ён не выключае, што ня пойдзе да канца і здыме сваю кандыдатуру датэрмінова.

«Мы будзем вельмі мабільныя, мы будзем адсочваць усю сытуацыю. Калі наш удзел нейкім чынам захочуць скарыстаць для легітымацыі вынікаў выбараў, мы гатовыя і на іншыя, рашучыя крокі. Пакуль мы гэта не разглядаем як асноўны сцэнар», — падкрэсьліў ён.

Але Лябедзька катэгарычна супраць поўнага байкоту.

«Я і мая каманда зь вялікай павагай адносімся да тых, хто сёньня яшчэ прытрымліваецца пазыцыі байкоту. Калі людзі ня хочуць удзельнічаць у галасаваньні — гэта азначае, што яны разумеюць, што ў Беларусі няма свабодных, сумленных выбараў, што іхнія галасы ня ўлічваюцца. Гэта слушная пазыцыя, але не пэрспэктыўная і не эфэктыўная на сёньняшні дзень», — лічыць старшыня АГП.

Лябедзька заявіў, што трэба павялічыць колькасьць актыўных удзельнікаў палітычнага працэсу:

«Бяз гэтага мы выдыхаемся. Нас высмоктвае эміграцыя, нас заганяе ў нейкія рамкі вельмі шчыльныя ўлада. Яны дамагліся за 20 гадоў таго, што мы страцілі ўстойлівыя камунікацыі з насельніцтвам, зь людзьмі. Для нас гэта шанец вярнуць гэтыя камунікацыі».

Лябедзька паведаміў, што АГП упершыню паспрабуе арганізаваць працу па зборы подпісаў падчас прэзыдэнцкай кампаніі выключна на валянтэрскіх асновах.

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG