Уладзімір Кара-Мурза, журналіст расейскай службы Радыё Свабодная Эўропа/Радыё Свабода, заявіў, што прыйшоў да высновы, што яго сын быў атручаны, пасьля таго як лекары не змаглі вызначыць дакладную прычыну яго раптоўнай хваробы.
Сын, таксама Ўладзімір Кара-Мурза, быў дастаўлены ў бальніцу ў Маскве 26 траўня з сымптомамі нырачнай недастатковасьці, а затым упаў у кому.
«Лекары не змаглі вызначыць дакладную прычыну хваробы. Мы стаміліся ад сьмешных прыпушчэньняў пра рутыннае харчовае атручаньне, якія цыркулююць у сродках масавай інфармацыі, — сказаў старэйшы Кара-Мурза. — Той, хто еў зь ім тую ж ежу ў той жа дзень, у поўным парадку. Ён быў адзіным, хто рэзка адчуў сябе вельмі дрэнна гадзіну пасьля абеду ў той дзень. Цяпер у нас ёсьць усе падставы меркаваць, што мой сын быў атручаны».
Малодшы Кара-Мурза, якому цяпер 33 гады, зьяўляецца каардынатарам «Адкрытай Расіі», няўрадавай арганізацыі пад патранажам былога расейскага нафтавага магната Міхаіла Хадаркоўскага, вядомага суперніка прэзыдэнта Расеі Ўладзімера Пуціна. Хадаркоўскі правёў больш за дзесяць гадоў у турме і цяпер жыве ў Швэйцарыі.
«Адкрытая Расея» нядаўна зьняла дакумэнтальны фільм з крытыкай пракрамлёўскага лідэра Чачні Рамзана Кадырава.
3 чэрвеня жонка малодшага Кара-Мурзы паведаміла, што яе муж выйшаў з комы і пазнае сваякоў.
Старэйшы Кара-Мурза распавёў Радыё Свабодная Эўропа/Радыё Свабода, што яго сын знаходзіцца пад узьдзеяньнем моцных лекаў і пакуль ня можа растлумачыць, што адбылося.
У дадатак да сваёй працы ў «Адкрытай Расеі», малодшы Кара-Мурза раней быў палітычным саюзьнікам апазыцыйнага палітыка Барыса Нямцова, які быў застрэлены ў цэнтры Масквы ў лютым. Цяпер ён працуе ў апазыцыйнай партыі «РПР-Парнас», сузаснавальнікам якой быў Нямцоў.
Малодшы Кара-Мурза мае падвойнае грамадзянства Расеі і Вялікай Брытаніі. Разам са сваёй жонкай і дзецьмі ён жыве ў Вашынгтоне. Ён зьяўляецца ключавым зьвяном паміж расейскімі апазыцыйнымі групамі і вядучымі амэрыканскімі палітыкамі. Ён часта езьдзіць у Расею, каб правесьці сэмінары ды іншыя мерапрыемствы для актывістаў апазыцыі.
