«Я прыехаў на Майдан, калі забілі Міхаіла Жызьнеўскага. Менавіта празь ягоную сьмерць і прыехаў», — кажа жаўнер-добраахвотнік з пазыўным «Беларус».
Ён стаў героем новага фільма рэжысэра Антося Цялежнікава, які прадстаўляе тэлеканал Белсат.
Хлапец паходзіць з Усходняй Беларусі, а цяпер ваюе каля Данецка ў шэрагах «Правага сэктару».
У Беларусі яму пагражае турма за ўдзел у вайсковых дзеяньнях, таму хлопец хоча атрымаць украінскае грамадзянства.
Цялежнікаў паказвае звычайнае вайсковае жыцьцё беларускага добраахвотніка: хлопец добра гаворыць па-ўкраінску, карыстаецца вайбэрам, цытуе Каліноўскага, даглядае зброю і ваюе.
У фільме гучыць песьня «Не здавайся», напісаная бардам і беларускім валянтэрам-капэлянам Алесем Чаркашыным, зь якім рэжысэр пазнаёміўся на фронце.
У вайсковым канфлікце на баку Ўкраіне прымае ўдзел каля 100 беларускіх добраахвотнікаў.
Месяц таму на тэлеканале Белсат адбылася прэм’ера фільму «Добраахвотнікі» рэжысэра Антося Цялежнікава, які паказвае жыцьцё добраахвотніцкага батальёну «Правы сэктар».
