За законапраект прагаласавалі 400 сябраў Палаты прадстаўнікоў, супраць — 25. Раней гэты дакумэнт быў ухвалены Сэнатам ЗША. Паводле працэдуры, цяпер закон павінен падпісаць або вэтаваць прэзыдэнт Абама.
Пагадненьне паміж Іранам і шасьцю сусьветнымі дзяржавамі, сярод якіх і ЗША, павінна быць падпісана да 30 чэрвеня. Іран павінен абмежаваць сваю ядзерную дзейнасьць у абмен на адмену ўведзеных заходнімі краінамі эканамічных санкцыяў.
Многія сябры Кангрэсу лічаць, што давяраць Тэгерану нельга. Гэтае пытаньне стала прадметам спрэчак паміж заканадаўцамі і адміністрацыяй прэзыдэнта Абамы.
Прыняты ў чацьвер законапраект прадугледжвае, што прэзыдэнт ЗША павінен накіраваць канчатковы тэкст дамовы з Іранам на разгляд абедзьвюх палат Кангрэсу, якія цягам 30 дзён павінныя ўхваліць або не прыняць пагадненьне. Белы дом заяўляе, што ў тым выпадку, калі Кангрэс ня прыме гэтую дамову, прэзыдэнт Абама накладзе вэта на рашэньне заканадаўцаў.
