Пра гэта ў Горках паведаміў журналістам старшыня Сьледчага камітэта Беларусі Валянцін Шаеў, перадае сайт horki.info. Валянцін Шаеў патлумачыў, што заведзеная крымінальная справа паводле часткі 1 артыкулу 338 КК (выкананьне працаў або аказаньне паслуг, якія не адпавядаюць патрабаваньням бясьпекі).
Паводле папярэдняй вэрсіі, надзіманы манеж ня быў належным чынам замацаваны, і невялікае ўзмацненьне ветру яго перакуліла. Мэтэаролягі пацьвердзілі, што 4 траўня ў Горках назіраліся парывы ветру да 7 м / с.
У выніку здарэньня дзевяць дзяцей атрымалі траўмы рознай ступені цяжкасьці.
4 траўня каля 17.00, як мяркуецца, з-за моцнага парыву ветру перакуліўся атракцыён «Надзіманы манеж». У гэты момант на ім знаходзіліся дзевяць дзяцей, у выніку ўсе яны атрымалі траўмы рознай ступені цяжкасьці і былі дастаўлены ў Горацкую раённую бальніцу. Трое малых знаходзяцца ў хірургічным аддзяленьні, шасьцёра — у дзіцячым. Самаму маленькаму дзіцяці два з паловай гады, старэйшаму — дзесяць гадоў.
