Пра гэта гаворыцца ў праекце рэзалюцыі, ухваленым Камітэтам Эўрапарлямэнта па замежных справах.
«Калі Расея будзе працягваць дэстабілізацыю сытуацыі ў Данбасе і не адмовіцца ад анэксіі Крыму, ЭЗ актывізуе санкцыі супраць яе і разгледзіць магчымасьць прадстаўленьня Ўкраіне абарончай зброі і іншай ваеннай дапамогі», — гаворыцца ў паведамленьні, апублікаваным на сайце Эўрапарлямэнту 5 траўня.
«Вяртаньне Крыму зьяўляецца вельмі важным для доўгатэрміновага супрацоўніцтва Эўразьвязу з Расеяй», — гаворыцца ў рэзалюцыі.
Дэпутаты выказалі занепакоенасьць перасьледам крымскіх татараў на паўвостраве, якое пачалося пасьля акупацыі Крыму, а таксама занепакоенасьць з-за ціску Расеі на ўсходняй мяжы ЭЗ.
Гэтая рэзалюцыя, якая зьяўляецца палітычнай заявай, будзе пастаўленая на галасаваньне Эўрапарлямэнту на сэсіі ў чэрвені.
Адносіны паміж Масквой і Захадам пагоршыліся ў мінулым годзе, пасьля расейскай анэксіі Крыму.
Украіна і Захад абвінавачваюць Расею ў падтрымцы прарасейскіх сэпаратыстаў у Данбасе. Масква гэтыя абвінавачваньні абвяргае, заяўляючы, што на Данбасе няма расейскіх вайскоўцаў, але ёсьць «добраахвотнікі».
Міжнародная супольнасьць увяла санкцыі супраць Расеі пасьля анэксіі ёю Крыму ў сакавіку 2014 году. Пасьля першых абмежавальных захадаў іх некалькі разоў узмацнялі. Санкцыі супраць Расеі ўвялі у прыватнасьці ЗША, Канада, Эўразьвяз, Аўстралія і Швэйцарыя.