Таксама падчас апэрацыі па вызваленьні пракурора застрэлілі двух чалавек, якія бралі яго ў закладнікі.
Прэзыдэнт Турцыі Рэджэп Таіп Эрдаган паведаміў, што падчас апэрацыі па вызваленьні, пракурора Кіраза паранілі ў галаву, яго даставілі ў шпіталь, дзе лекары спрабавалі выратаваць яго.
Паводле слоў прэм’ер-міністра Турцыі Ахмета Давутаглу, Мехмэт Селім Кіраз памёр падчас апэрацыі.
Згодна з паведамленьнем паліцыі, рашэньне штурмаваць будынак суду было прынятае пасьля таго, як падчас тэлефонных перамоваў з нападнікамі сілавікі пачулі страляніну.
31 сакавіка прадстаўнікі скрайне левай групы Рэвалюцыйная народная вызваленчая партыя-фронт захапілі пракурора і пагражалі яго забіць.
Пракурор Кіраз расьсьледаваў сьмерць 15-гадовага хлопца, які загінуў ад дзеяньня газавага балёнчыка, які паліцэйскія ўжылі супраць удзельнікаў антыўрадавых пратэстаў у 2013 годзе.
Людзі, якія захапілі пракурора, патрабавалі, каб супраць паліцыі былі прад’яўленыя абвінавачваньні ў сьмерці хлопца, а таксама, каб былі закрытыя справы супраць актывістаў, што праводзілі акцыі ў падтрымку загінулага.
Прадстаўнікоў Рэвалюцыйнай народнай вызваленчай партыі-фронту абвінавачваюць у зьдзяйсьненьні выбуху ля амбасады ЗША ў Турцыі ў 2013 годзе. ЗША, ЭЗ і Турцыя ўнесьлі гэтую арганізацыю ў сьпіс тэрарыстычных.
