Новае фота кожны дзень, увесь год. Загружайце сюды свае здымкі гарадзкіх і прыродных краявідаў, падзеяў і зьяваў жыцьця ў 2015 альбо на пошту radiosvaboda@gmail.com. Пажадана дасылаць фота ў прапорцыі 16 на 9. Усе аўтары фота, апублікаваных на сайце Свабоды, атрымаюць прызы. Тры найбольш папулярныя здымкі месяца будуць адзначаныя асобна.
Афіша:
Сёньня ў сьвеце адзначаецца Міжнародны жаночы дзень. Першы раз быў адсьвяткаваны ў 1911 годзе ў Капэнгагене, Данія, з ініцыятывы Кляры Цэткін, дзяячкі нямецкага і міжнароднага камуністычнага руху ды змагаркі за правы жанчын.
У Нацыянальным мастацкім музэі пройдзе праект «Жанчына — гэта мастацтва!» прысьвечаны Міжнароднаму жаночаму дню. У рамках праекту ў вэстыбюлі музэю будуць экспанавацца творы жывапісу, зьвязаныя з жанчынамі.
Беларусь з афіцыйным пяцідзённым візытам наведае міністар замежных справаў Карэйскай Народна-Дэмакратычнай Рэспублікі Лі Су Ён. У рамках візыту заплянаваныя перамовы зь міністрам замежных справаў Беларусі Уладзімерам Макеем, а таксама сустрэчы ў беларускім урадзе. У паўночнакарэйскай дэлегацыі заплянавана наведваньне беларускіх прамысловых прадпрыемстваў і культурна-гістарычных месцаў Менску і Менскай вобласьці.
У памяці:
1892 — нарадзіўся Алесь Чарвякоў, кіраўнік БССР.
1910 — нарадзіўся Пятро Конюх, беларускі опэрны сьпявак.
1928 — памёр Пётра Крэчэўскі, беларускі палітычны дзяяч, гісторык, Прэзыдэнт Рады БНР.
1954 — нарадзіўся Андрэй Саньнікаў, беларускі палітык, палітычны вязень.
1962 — нарадзіўся Славамір Адамовіч, беларускі паэт.
2004 — памёр Міхась Наўмовіч, дзеяч беларускае эміграцыі, старшыня Беларускага Згуртаваньня ў Францыі «Хаўрус» і сябра Рады БНР.
Цытата:
«Не магу, не хачу адмовіць,
Калі просяць вочы твае,
Калі рукі пяшчотна ловяць,
Твае рукі ловяць мае.
Сёньня твой, я сьцялю нам ложак,
Выдзяляючы эндарпін^;
Я твой бог, твой д’ябал бяз рожак,
Муж любімы твой, бацька, сын.
Я прыйшоў. Ты рабі, што трэба:
Расцалуй альбо прагані,
Альбо выплаві зь мяне срэбра
На сваім залатым агні».
Славамір Адамовіч
