Выданьне публікуе дакумэнт, які апынуўся ў распараджэньні рэдакцыі і які мог разглядацца адміністрацыяй прэзыдэнта, мяркуецца, у пэрыяд паміж 4 і 12 лютага 2014 году. У пляне гаворыцца пра тое, што Расея магла б узяць удзел у «геапалітычнай інтрызе» па разьдзеле Ўкраіны.
Ніякіх разваг аб «рускім сьвеце» ці абароне расейскамоўных жыхароў там няма. Затое аўтары дакумэнту двойчы нагадваюць пра неабходнасьць захаваць кантроль над украінскай газатранспартнай сыстэмай (ГТС).
У пляне прыводзіцца ацэнка сытуацыі ва Ўкраіне ў апошнія дні прэзыдэнцтва Віктара Януковіча і плян умяшаньня Расеі ў гэтую сытуацыю. На думку аўтараў дакумэнту, сытуацыя ў той час была складаная. Януковіч, «чалавек невысокіх маральна-валявых якасьцяў», імкліва губляў уладу. Вызначыць яго пераемніка — «выразнага палітычнага суб’екта, зь якім Расейская Фэдэрацыя магла б весьці перамовы», — уяўлялася немагчымым.
Аўтары распрацоўкі былі ўпэўненыя, што палітыкамі ва Ўкраіне кіруюць алігархі, і на Майдане «пануюць» маргіналы і прадстаўнікі крыміналітэту, нібыта падкантрольныя польскім і брытанскім спэцслужбам. Украіна будзе паглынутая Эўразьвязам, — меркавалі аналітыкі і прапаноўвалі Расеі паўдзельнічаць у «геапалітычнай інтрызе».
Па-першае, прапаноўвалася спыніць падтрымку Януковіча, паколькі гэта ўжо «ня мае ніякага сэнсу». Па-другое, пастулявалася неабходнасьць «ўмяшацца ў геапалітычную інтрыгу». Інакш, пісалі аўтары дакумэнту, Расея рызыкуе страціць ня проста ўкраінскі рынак збыту энэрганосьбітаў, але і кантроль над газатранспартнай сыстэмай Украіны, што паставіць пад удар «Газпром» і можа нанесьці шкоду эканоміцы.
Уплываць на сытуацыю ў краіне, якая, на думку аўтараў дакумэнту, ужо расколатая па восі «захад-ўсход», прапаноўвалася спачатку легітымнымі мэтадамі: «дамагчыся заключэньня дамоваў аб прыгранічным і трансгранічным супрацоўніцтве, а затым усталяваць прамыя дзяржаўна-дамоўныя дачыненьні з тымі украінскімі тэрыторыямі, дзе ў наяўнасьці ўстойлівыя прарасейскія электаральныя сымпатыі ». Аўтары пляну сьцьвярджалі, што эліты павінны падтрымаць гэтае рашэньне, паколькі асьцерагаюцца «чыстак»: у Кіеве на іх ёсьць дастаткова «кампрамату».
Аўтары дакумэнту прапаноўвалі выкарыстоўваць і менш праўныя мэтады. У прыватнасьці, прапаноўвалася ініцыяваць далучэньне ўсходніх абласьцей Украіны да Расеі. «Неабходна падрыхтаваць ўмовы для правядзеньня ў Крыме і Харкаўскай вобласьці (а далей і ў іншых рэгіёнах) рэфэрэндумаў, якія ставяць пытаньне пра самавызначэньне і далейшай магчымасьці далучэньня да Расейскай Фэдэрацыі», — адзначаецца ў дакумэнце. Павінны былі быць вылучаны патрабаваньні «фэдэралізацыі» і «сувэрэнізацыі».
Для гэтага плянавалася заручыцца падтрымкай элітаў: тагачаснага мэра Харкава Міхаіла Добкіна (цяпер — дэпутата Рады ад «Апазыцыйнага блёку») і старшыні партыі «Рускае адзінства» Сяргея Аксёнава (цяпер — кіраўнік Рады міністраў Крыму). Пры гэтым аўтары дакумэнта ўсьведамлялі, што легітымным чынам «запусьціць інтэграцыю ўкраінскіх ўсходніх тэрыторый і Крыму ў дзяржаўна-праўнае поле Расейскай Фэдэрацыі» немагчыма.
Распрацоўнікі пляну прапаноўвалі таксама разгарнуць PR-кампанію, каб пацьвердзіць «вымушаны характар» дзеяньняў актывістаў, якія павінны былі абвясьціць аб сувэрэнітэце. Меркавалася, што актывісты будуць выступаць супраць грамадзянскай вайны, супраць навязваньня ім волі Майдану і за разьвіцьцё адносін з РФ. «У падтрымку далучэньня ўсходніх абласьцей Украіны да Расіі павінны выступіць шырокія колы грамадзкасьці ў самой Расеі», — гаварылася ў дакумэнце.
У пляне паказваецца, што вышэйпералічаныя дзеяньні ня толькі дазволяць РФ захаваць кантроль над ГТС Украіны, але і нададуць імпульс інтэграцыйным праектам Крамля, а таксама дазволяць РФ вярнуць адну з галоўных роляў у Эўропе. «Новая газэта» падкрэсьлівае, што плян быў створаны яшчэ да таго моманту, які ў Маскве быў ахарактарызаваны як «дзяржаўны пераварот» і які «стаў галоўным апраўданьнем далейшых дзеяньняў». Акрамя таго, у выданьні зьвярнулі ўвагу, што ў дакумэнце не гаворыцца аб абароне расейскамоўных жыхароў і няма ніякіх філязофскіх разваг аб «Рускім сьвеце»: толькі «геапалітыка і халодная мэтазгоднасьць».
У газэце мяркуюць, што ў падрыхтоўцы дакумэнту мог прымаць удзел бізнэсовец Канстанцін Малафееў, які цяпер падтрымлівае сэпаратыстаў Данбасу.
