Вадзім Карасёў мяркуе, што сустрэча трохбаковай кантактнай групы па Ўкраіне, хутчэй за ўсё, адбудзецца. Але прарыву ніякага ня будзе. Прарывы могуць быць толькі на наступнай сустрэчы:
«Цяпер, відаць, улічваючы настроі ў грамадзтве, МЗС Украіны не дае дакладнай інфармацыі. Але ўчора Пятро Парашэнка сустракаўся і зь Леанідам Кучмам, і з прадстаўніцай АБСЭ Гайдзі Тальявіні, таму ўсё ж такі яны гатовыя выехаць. Гаварыць будуць, па-першае, пра спыненьне агню, абмен палоннымі. Таксама ключавое пытаньне на сёньняшні дзень — гэта аднаўленьне фінансаваньня падкантрольных ДНР і ЛНР тэрыторыяў, то бок зьняцьце фінансавай блякады. Тым больш што ў рэзалюцыі ПАРЭ па Ўкраіне таксама адзначаны абавязак украінскай дзяржавы працягваць выплачваць сацыяльную дапамогу і пэнсійныя выплаты. Так што тут можна спаслацца на рашэньні ПАРЭ і далей думаць, як усё ж такі правесьці лінію разьмежаваньня — альбо па факце на 5 верасьня, альбо на 15 студзеня, што было ў вядомым лісьце расейскага прэзыдэнта Пуціна. Ну, і пачынаць шукаць шляхі да рэальнага замірэньня, а потым і да міру, бо сытуацыя ўсё больш і больш ускладняецца, яна тупіковая. І цяпер вельмі дрэнная тэндэнцыя праглядаецца: гіне ўсё больш мірных людзей.
Тым больш што МВФ прыпыніў дапамогу Ўкраіне з умовай: пакуль будзе вайна — фінансаваньня з боку Міжнароднага валютнага фонду ня будзе. Пра гэта сказала спадарыня Крысьціян Лагард, і дзяржсакратар ЗША Джон Кэры асабіста прыяжджаў у штаб-кватэру МВФ і прыпыніў выдачу крэдытаў.
Паводле інфармацыі ва ўкраінскай прэсе, па маіх адчуваньнях, ідзе такая магутная закулісная гульня, мэта якой — пасадзіць усе бакі за стол перамоваў спачатку ў Менску, а потым у Астане па нармандзкім фармаце. Менск і Астана — вось два гарады, якія могуць адчыніць вакно новых магчымасьцяў, прынамсі каб спыніць актыўныя ваенныя дзеяньні».
