«Мы ж не абураемся тым, што Расея мэтанакіравана прыкладае цяпер калясальныя намаганьні для нармалізацыі стасункаў з Захадам. Вось і вы не абурайцеся. Трэба супакоіцца і нармальна працаваць», — сказаў Лукашэнка, выступаючы ў беларускім парлямэнце.
Пры гэтым ён адзначыў, што «Расея нам нікога не заменіць».
«І калі я гутару з заходнімі амбасадарамі, я пытаюся ў іх: вы Расею нам заменіце? На прыкладзе Ўкраіны ж відаць, да чаго прыводзіць гэтая дружба — да зацягваньня ў балота. Таму я кажу — гэта наша Расея, мы найцясьнейшым чынам зьвязаныя з гэтай краінай, яна заўсёды падстаўляла нам плячо, няхай не без праблемаў, але гэта ж заўсёды было», — заявіў Лукашэнка.
Паводле Лукашэнкі, у Беларусі таваразварот з РФ такі самы, як і з ЗША і краінамі ЭЗ.
Чаму ж мы зь імі не павінны супрацоўнічаць? Адносіны крыху іншыя, але іх трэба выбудоўваць.
«Чаму ж мы зь імі не павінны супрацоўнічаць? Адносіны крыху іншыя, але іх трэба выбудоўваць. Няхай ніхто не напружваецца ні тут, ні там. Мы будзем пасьлядоўна і мэтанакіравана выбудоўваць адносіны з ЭЗ і ЗША».
Лукашэнка адзначыў, што ў гэтых дзяржавах чакаюць ад Беларусі нейкіх сыгналаў, чакаюць, пакуль у краіне пройдуць прэзыдэнцкія выбары. Маўляў, Беларусь разумее гэтую асьцярожнасьць і гатовая чакаць.
«Мы ніколі не былі здраднікамі і ня будзем, мы адкрыта заяўляем пра сваю пазыцыю», — Цытуе кіраўніка дзяржавы interfax.by
