Лінкі ўнівэрсальнага доступу

Наркагандляры любяць Мытны саюз


Наркотыкі трапляюць у Беларусь у асноўным з краін Азіі транзытам праз Расею.

Беларусь застаецца краінай транзытнага наркатрафіку і ўсё шырэйшага спажываньня новых («дызайнэрскіх») наркотыкаў і курыльных сумесяў. Пра гэта паведаміў на прэсавай канфэрэнцыі начальнік галоўнай управы па наркакантролі і супрацьдзеяньні гандлю людзьмі МУС Васіль Лосіч.

«Новымі» называюць самыя сучасныя наркатычныя рэчывы, пераважна сынтэтычныя. Вытворцы ўвесь час мяняюць іх хімічныя формулы.

Паводле Васіля Лосіча, «новыя» наркотыкі складаюць ужо 70% наркатычнага рынку Беларусі. Асноўнае месца паходжаньня гэтых наркотыкаў — Кітай ды іншыя краіны азіяцкага рэгіёну.

Зь якіх яшчэ краін сьвету паступаюць наркотыкі ў Беларусь? Васіль Лосіч гэтак адказаў на пытаньне карэспандэнта Свабоды:

Васіль Лосіч
Васіль Лосіч
​«За мінулы 2014 год у нас выяўлена і спынена 40 каналаў трапленьня наркотыкаў. Частка зь іх транзытныя, якія не былі прызначаныя для спажываньня ў Беларусі, але мы іх таксама адсочвалі. Прыкладам, восеньню была затрыманая вялікая партыя гераіну з Кіргізстану, якая ішла часткова ўва Ўкраіну, а часткова ў Літву. Нам удалося гэтую партыю перахапіць. Што да каналаў наркотыкаў непасрэдна ў Беларусь, то ў асноўным яны ідуць да нас праз Расею. Паўночны маршрут аўганскіх апіятаў прадугледжвае, што яны ідуць праз Расею, потым празь Беларусь і Ўкраіну на Эўропу. Гэты маршрут, паводле ацэнак, складае чвэрць усяго аўганскага гераіну. І частку праблемаў, якія спараджае гэты паток, мы спазнаем на сабе. Паколькі Мытны саюз прадугледжвае адсутнасьць бар’ераў — мяжы, мытні — то, безумоўна, транзытчыкі наркотыкаў яго абіраюць, бо лічаць яго больш бясьпечным.

Другая група наркотыкаў, гэтыя «новыя» наркотыкі, ідзе праз Расею поштаю, і тут мы цяпер пабудавалі моцны заслон гэтаму кірунку. Тут сытуацыя пачала абвастрацца з 2013 году дзякуючы новым магчымасьцям. Адну дозу можна атрымаць, маючы 2 тысячныя грама рэагенту — гэта зусім мала. Яго можна поштай адправіць, у саматужных умовах разьвесьці і атрымаць вялікую колькасьць дозаў для спажываньня. Карэспандэнцыю ў Беларусь мы жорстка кантралюем, але тая карэспандэнцыя, якая ідзе з Расеі транзытам праз нашу краіну, — крыніца вялікіх праблемаў.

У нас традыцыйна праблемныя зоны ў пастаўках сынтэтычных наркотыкаў — гэта Літва і Польшча. Таксама адтуль ідуць наркотыкі амфэтамінавага шэрагу. Праблемаў з расьліннымі наркотыкамі нам дадае Ўкраіна, адкуль ідзе макавая саломка і насеньне маку — сыравіна вырабляць опіюм. Транзытны гашыш ідзе таксама з Гішпаніі і Галяндыі, а туды трапляе з Марока. Мы перахоплівалі таксама некалькі паставак гераіну з краінаў Паўднёвай Амэрыкі.

Што да курыльных сумесяў, дык тут асноўны пастаўшчык — краіны азіяцкага рэгіёну побач з Кітаем і сам Кітай. Але паставак наўпрост адтуль мы ўжо не назіраем, як было ў 2013 годзе. Цяпер адтуль у асноўным ідуць паштовыя адпраўленьні праз Расею«.

Паводле прагнозу Васіля Лосіча, з увядзеньнем у 2015 годзе крымінальнай адказнасьці за правоз наркотыкаў празь мяжу з Расейскай Фэдэрацыяй гэты транзытны паток удасца скараціць. Раней, паводле міліцыянта, былі розныя падыходы. Прыкладам, правоз наркотыкаў празь межы Беларусі з краінамі Эўразьвязу кваліфікаваўся як кантрабанда наркотыкаў, а празь мяжу з Расеяй — толькі як «хаваньне», што каралася ня гэтак цяжка.

Васіль Лосіч паведаміў, што ў шэрагах беларускай міліцыі зьявілася «наркатычная выведка» — адмысловыя падразьдзяленьні па выведцы ў галіне нарказлачыннасьці. Сярод расьсьледаваных спраў аб распаўсюдзе наркотыкаў у Беларусі ёсьць справа, у якой фігуруюць і прадстаўнікі праваахоўных органаў, якія дапамагалі наркадзялкам. Дэталі гэтай справы, як мяркуе Васіль Лосіч, будуць неўзабаве паведамленыя грамадзкасьці.

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG