Саўчанка, абраная дэпутаткай Вярхоўнай Рады Украіны паводле сьпісу партыі «Бацькаўшчына», 25 сьнежня 2014 году была ўключаная ў склад украінскай дэлегацыі на сэсію ПАРЭ.
13 сьнежна Надзея Саўчанка, якая ў чэрвені летась трапіла ў палон да прарасейскіх сэпаратыстаў, распачала галадоўку ў турме ў Маскве. Пра матывы галадоўкі яна напісала ў лісьце «ўсім, каму неабыякавы мой лёс», які перадала на волю праз сваіх адвакатаў:
«Сваім пратэстам — голадам — я хачу дамагчыся здаровага сэнсу ад расейскай улады і сумленьня ад Сьледчага камітэту РФ. Ёсьць бясспрэчныя доказы маёй недатычнасьці і невінаватасьці ў тых злачынствах, у якіх мяне вінавацяць. Што ім яшчэ трэба?
Рашэньне галадаць я прыняла самастойна, ніхто мяне да гэтага не схіляў. Дала слова: „Да дня вяртаньня мяне на Украіну ці да апошняга дня жыцьця ў Расеі!“ — І назад яго не вазьму, інакш чаго будуць каштаваць мае словы! ;)»
Надзею Саўчанку абвінавачваюць у датычнасьці да гібелі расійскіх журналістаў Ігара Карнелюка і Антона Валошына ў Луганскай вобласьці Ўкраіны. Яна віну адмаўляе. Раней абарона прадставіла суду дакумэнты, якія даказваюць, што ў момант, калі журналісты трапілі пад мінамётны абстрэл, Саўчанка ўжо гадзіну знаходзілася ў палоне ў сэпаратыстаў, якія затым пераправілі яе ў Расею.
На думку адвакатаў, адмаўляючыся вызваліць Саўчанку з-пад варты (апошні раз яе арышт быў працягнуты да 13 лютага), расейскія ўлады парушаюць атрыманы ёю пасьля абраньня дэлегаткай на сэсію ПАРЭ міжнародны імунітэт.
