Пра гэта ў Маскве паведаміў журналістам сябра Рады Эўразійскай эканамічнай камісіі Сяргей Румас пасьля пасяджэньня Рады ЭЭК.
Паводле Румаса, Рассельгаснагляд перавысіў свае паўнамоцтвы, і першы віцэ-прэм’ер Расеі Ігар Шувалаў распарадзіўся, каб Рассельгаснагляд вярнуўся ад забароны паставак беларускай прадукцыі да праверак прадпрыемстваў.
«Разьлічваем, што 11 сьнежня расейскі бок адкрые частку прадпрыемстваў для паставак прадукцыі ў Расею», — падкрэсьліў Сяргей Румас.
Паводле Румаса, больш складана выглядае сытуацыя зь беларускімі прадпрыемствамі, у прадукцыі якіх выяўлены геном афрыканскай чумы сьвіней. Сяргей Румас мяркуе, што гэтая праблема будзе таксама неўзабаве вырашана. Аднак патрэбны час, каб разабрацца, адкуль геном АЧС трапіў у прадукцыю.
Сёньня гарадзенскі мясакамбінат заявіў, што аспрэчыць рашэньне пра забарону экспарту прадукцыі ў РФ і спадзяецца на хуткае вырашэньне сытуацыі, — паведаміў БЕЛТА гендырэктар прадпрыемства Анатоль Грышук. Ён сказаў, што забарона стварае сур’ёзную праблему, бо штомесяц у Расею пастаўляецца каля 1 тысячы тон мясной прадукцыі. «Забарона вымусіць нас спыніць прыёмку мяса, што створыць дадатковыя цяжкасьці», — сказаў гендырэктар. Мяса будуць складаваць, але замарожанае яно моцна падае ў кошце. Гэта вялікія страты для мясакамбіната, дадаў ён. З 10 сьнежня Рассельгаснагляд забараніў пастаўкі ў Расею прадукцыі гарадзенскага мясакамбіната.
РФ забараніла пастаўку харчоў больш чым з 20 прадпрыемстваў Беларусі з-за геному вірусу АЧС, мікробнага забруджваньня і антыбіётыкаў. Бакі пачалі сумесныя праверкі шэрагу прадпрыемстваў.
