Лінкі ўнівэрсальнага доступу

Пуцін заявіў, што Расея не скарыцца перад Захадам у пытаньні Ўкраіны

абноўлена

Прэзыдэнт РФ Уладзімір Пуцін выступае ў Маскве з пасланьнем да Фэдэральнага сходу.

Прэзыдэнт РФ Уладзімір Пуцін выступае ў Маскве з пасланьнем да Фэдэральнага сходу.

Сярод іншага, ён заявіў, што Расея ня будзе сьлепа трымацца ў фарватэры Захаду па ўкраінскім пытаньні.

«Дзеля чаго ўся гэтая трагедыя ва Украіне? Хіба нельга было палагодзіць ўсе пытаньні, нават спрэчныя, падчас дыялёгу, у рамках прававога поля і легітымных працэсаў? Аднак нас цяпер усімі сіламі спрабуюць пераканаць у тым, што гэта і ёсьць граматная ўзважаная палітыка, якой мы павінны бяздумна і сьлепа падпарадкоўвацца. Гэтага ня будзе».

Пуцін сказаў, што «калі для шэрагу эўрапейскіх краін нацыянальны гонар — даўно ўжо забытае паняцьце, а сувэрэнітэт — занадта вялікая раскоша, то для Расеі рэальны дзяржаўны сувэрэнітэт абсалютна неабходная ўмова існаваньня».

Пуцін адхіліў магчымасьць руху Расеі па шляху ізаляцыянізму, ксэнафобіі і пошуку ворагаў.

«Мы самі ніколі ня пойдзем па шляху самаізаляцыі, ксэнафобіі, падазронасьці, пошуку ворагаў. Гэта ўсё праявы слабасьці, а мы моцныя і ўпэўненыя ў сабе. Наша мэта — як мага больш набыць раўнапраўных партнэраў як на Захадзе, так і на Ўсходзе».

Ён падкрэсьліў, што Расея ні пры якіх абставінах ня будзе згортваць супрацоўніцтва з Эўропай і Амэрыкай, адзначыўшы пры гэтым, што краіна мае намер разьвіваць традыцыйныя сувязі з Паўднёвай Амэрыкай, а таксама супрацоўнічаць з краінамі Блізкага Ўсходу і Афрыкі.

Пры гэтым Пуцін заявіў, што пазыцыя Расеі адносна сувэрэнітэту былых савецкіх рэспублік, у тым ліку Ўкраіны, не зазнала зьмен: Масква ставіцца да яго з павагай.

Паводле Пуціна, «добра вядома, што Расея ня толькі падтрымала Ўкраіну і іншыя брацкія рэспублікі былога СССР у іх імкненьні да сувэрэнітэту, але і ў значнай ступені спрыяла гэтаму працэсу на мяжы 90-х гадоў». «З тых часоў у нашай пазыцыі нічога не зьмянілася», сказаў Пуцін і дадаў, што «кожны народ мае неад’емнае сувэрэннае права на ўласны шлях разьвіцьця, на выбар саюзьнікаў, форму палітычнай арганізацыі грамадзтва, пабудова эканомікі і забесьпячэньне сваёй бясьпекі... Гэта ў поўнай меры датычыцца і Ўкраіны, братняга ўкраінскага народу».

Назіральнікі з Расейскай службы нашага радыё зьвяртаюць увагу на рэзкі тон першай часткі Пуцінскай прамовы.

«Калі б усяго гэтага не было (канфлікту на Украіне — РС), прыдумалі б што-небудзь яшчэ, каб стрымаць растучыя магчымасьці Расеі... Чым больш мы апраўдваемся, тым больш бессаромна і агрэсіўна паводзяць сябе нашы апанэнты... Нас з задавальненьнем пусьцілі б па югаслаўскім сцэнары распаду. Ня выйшла. Мы не дазволілі. Гэтак жа, як ня выйшла і ў Гітлера».

Наконт Крыму Пуцін заявіў, што з Крыму і Херсанэсу пачалася адзіная расейская нацыя.

Палітоляг: Пазыцыя Пуціна па Ўкраіне абсалютна не зьмянілася

Менскі палітоляг Андрэй Фёдараў называе галоўным з той часткі пасланьня Ўладзімера Пуціна, якое тычыцца сытуацыі вакол Украіны, нязьменнасьць пазыцыі расейскага кіраўніка:

«Я быў упэўнены, што так і будзе. Ніякіх падставаў для зьмяненьня пазыцыі Пуціна пакуль няма. Бо тыя праблемы, якія апошнім часам узьніклі ў Расеі, яшчэ не настолькі моцна закранулі яе насельніцтва. Рэйтынг таго ж Пуціна пакуль застаецца ў памерах 80%. І таму ніякіх падставаў чакаць, што кіраўніцтва Расеі памяняе свае падыходы, не выпадала. Я думаю, што такое становішча будзе захоўвацца яшчэ даволі доўга. Калі ж насамрэч адбудзецца нейкая значная зьмена, то Пуцін у такім выпадку можа згубіць даволі шмат у вачах расейскага насельніцтва. Таму да зьменаў можа прывесьці толькі вельмі моцны прымус».

Глядзець камэнтары (2)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG