Лінкі ўнівэрсальнага доступу

Беларусы на кіеўскім Майдане: Еднасьць адчувалася ў самім паветры


Фота з сайту antimaidan.by

Радыё Свабода ўзнаўляе гісторыю беларусаў на Майдане. Падзяліцца сваімі фатаздымкамі і ўражаньнямі пра ўдзел у Майдане можна да 31 сьнежня, даслаўшы іх на radiosvaboda@gmail.com.

21 верасьня Ўкраіна адзначае Дзень годнасьці і свабоды. Год таму ў гэты дзень першыя сотні ўкраінцаў выйшлі на мірны Майдан. Разам зь імі на кіеўскай плошчы былі беларусы. Побач з жоўта-блакітнымі луналі бел-чырвона-белыя сьцягі, а расьцяжка «Беларусь з вамі» была, бадай, самая вялікая і правісела да апошняга.

Адным зь першых герояў Нябеснай сотні стаў беларус Міхаіл Жызьнеўскі.

Радыё Свабода ўзнаўляе гісторыю беларусаў на Майдане. Падзяліцца сваімі фатаздымкамі і самымі яскравымі ўражаньнямі пра свой удзел у Майдане можна да 31 сьнежня, даслаўшы іх на radiosvaboda@gmail.com.

Каця Рамашкевіч на Майдане
Каця Рамашкевіч на Майдане

Кацярына Рамашкевіч: «Найбольш памятаю разгон на Банкавай»

Каця, сябра Сойму партыі БНФ, езьдзіла на Майдан пяць разоў: была і падчас разгону на Банкавай вуліцы, і падчас мірнага стаяньня. Апошні раз прыехала ў Кіеў 23 лютага — пасьля расстрэлу снайпэрамі «Нябеснай сотні».

Мяне вельмі ператрэсла, калі я заўважыла, што звычайны засьнежаны асфальт пад нагамі ператварыўся ў чорную масу — сумесь попелу, бруду, вады з брандспойтаў, рэштак таго, што згарэла

«З тых падзеяў, якія я асабіста засьпела, разгон на Банкавай вуліцы — відаць, самая значная. Тады міліцыя ўпершыню выкарыстала гукавыя і сьветлавыя гранаты, сьлезацечны газ, зьявіліся моцна зьбітыя. Але мне ўсё ж больш запомнілася апошняя паездка — 23 лютага. Па-першае, тады было страшна проста выходзіць з вакзалу, ня кажучы ўжо пра тое, каб ісьці ў бок Майдана. Мае сябры папярэдзілі, што на Майдане і на суседніх вуліцах пэрыядычна страляюць снайпэры, што ёсьць шмат забітых. Калі ўрэшце я выйшла на Храшчацік і пайшла да Майдану, мяне вельмі ператрэсла, калі я заўважыла, што звычайны засьнежаны асфальт пад нагамі ператварыўся ў чорную масу — сумесь попелу, бруду, вады з брандспойтаў, рэштак таго, што згарэла. Абсалютна чорны быў будынак прафсаюзаў, чорная маса пад нагамі, і людзі вакол з чорнымі ад дыму вопраткай і тварамі. Вось у той момант мне стала вельмі страшна і кепска».

Мікалай Дземідзенка зь сябрамі
Мікалай Дземідзенка зь сябрамі

Мікола Дземідзенка: «Майдан аддаліў нашу незалежнасьць»

У актывіста Маладога фронту Мікалая Дземідзенкі два Майданы. Першы — гэта студэнцкі пратэст. Другі — агрэсія з боку ўладаў, параненыя і забітыя. Другі ўразіў яго найбольш.

«Уразіла супраціўленьне і кансалідацыя ўкраінскай нацыі, а таксама яе яднаньне. Сёньня, праз год, можна казаць, што мы назіралі яднаньне нацыі».

Алесь Баразенка
Алесь Баразенка

Аляксандар Баразенка: «Майдан зрабілі самі ўкраінцы»

На Майдане журналіст Аляксандар Баразенка быў чатыры разы. Пазьней езьдзіў і ў Крым, і на ўсход Украіны, калі там разгарнулася АТА.

Сам кажа, што на Майдане бачыў усё: «ад мірнага пратэсту да забойства „Нябеснай сотні“».

Да гэтага мне ніколі не даводзілася сутыкацца з такой салідарнасьцю і масавасьцю

«Самае яркае ўражаньне — гэта ўзровень самаарганізацыі ўкраінцаў. Хто б што ні казаў, Майдан быў зроблены самім народам. Уразіў узровень дапамогі адно аднаму, еднасьць, якая адчувалася ў самім паветры, у тым, што ўкраінцы прыходзілі на Майдан цэлымі сем’ямі, дзяўчаты гатавалі, мужчыны стаялі на барыкадах. Гэта ўсё рабілася разам цэлай нацыяй. Да гэтага мне ніколі не даводзілася сутыкацца з такой салідарнасьцю і масавасьцю».

Якой стала Беларусь пасьля Майдана:

Кацярына Рымашкевіч: «Нехта баіцца, нехта спадзяецца, а ў кагосьці новая вера прачнулася. Тыя, хто там пабываў, прайшоў праверку на трываласьць, найперш маральную і псыхалягічную. Тыя, хто не паехаў ці нават мае супрацьлеглую Майдану пазыцыю, задумаліся над нейкімі пытаньнямі пра нашу краіну».

Мікалай Дземідзенка: «Мы пабачылі, што сёньня мы вельмі далёкія ад такіх падзеяў, якія адбываліся на Майдане. Для беларусаў пакуль Майдан немагчымы, і павінен прайсьці яшчэ вельмі доўгі час, пакуль нешта зьменіцца. Мяне гэта вельмі бянтэжыць. Я аб’ектыўна ацэньваю Майдан, разумею, што ня ўсё там было прыгожа, што былі ахвяры, безь якіх, напэўна, незалежнасьць і свабода немагчымыя. Але збольшага ацэньваю ўсе падзеі пазытыўна. Магу сказаць, што для Беларусі тыя падзеі аддалілі пэрспэктывы незалежнасьці, таму што большасьць беларусаў Майдан напужаў».

Аляксандар Баразенка: «З аднаго боку, Майдан — гэта добры прыклад для тых, хто жадае нешта зьмяніць у Беларусі. Мы пабачылі, што ўсё ў руках народу. І калі аб’яднацца вакол агульнай мэты, то ўсё магчыма. Зь іншага боку, Майдан паказаў, што можа адбыцца, калі ў сытуацыю прыходзяць вялікія палітычная гульцы — такія, як Пуцін. Мы пабачылі, што Расеі вельмі не спадабалася тое, што адбылося ва Ўкраіне, і да чаго гэта прывяло. Майдан — гэта аптымістычны прыклад для беларусаў, але шмат каго з нас ён можа спужаць, бо ніхто ня хоча вайны на сваёй тэрыторыі».

Глядзець камэнтары (7)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG