Курсы Дыджэяў Адраджэньня стартуюць у штаб-кватэры БНФ а 18-й . Вядучы Павал Севярынец.
«Беларусі зараз цяжка. Для таго каб падняць яе, уратаваць і адрадзіць у нацыянальным і духоўным плянах, мы рыхтуем людзей, якія гэта могуць і ўмеюць рабіць. Жніво вялікае, работнікаў мала. Але калі сэрца баліць за Беларусь, мы дапаможам вам падрыхтавацца і адраджаць Беларусь эфэктыўна», — так запрашае Павал Севярынец на курсы.
На першых занятках удзельнікі пройдуць тэст са ста пытаньняў і атрымаюць першапачатковы рэйтынг.
Якасьць пітной вады ў Менску будзе абмяркоўвацца ў часе тэматычнага дня Менгарвыканкаму (ад 10:00 да 13:00 у кантакт-цэнтры, тэл. 142).
Лідэр гурту «J:морс» Уладзімір Пугач стане паслом добрай волі Дзіцячага фонду ААН (ЮНІСЭФ) у Беларусі. Цырымонія ўступленьня пройдзе ў гатэлі «Пэкін» ад 14:30.
Паседжаньне Клюбу дзелавых жанчын пройдзе ад 16:00 у міжнародным цэнтры «Шлях чалавека» (зав. Паўночны, 15).
У менскім Архікатэдральным касьцёле будуць маліцца за ахвяраў Першай сусьветнай вайны. Вечаровую Імшу ў 18.30 з гэтай нагоды ўзначаліць Мітрапаліт Менска-Магілёўскі арцыбіскуп Тадэвуш Кандрусевіч.
ГЭТЫ ДЗЕНЬ У ГІСТОРЫІ
1917 — у Віцебску выйшаў першы нумар газэты «Известия военно-революционного комитета г. Витебска» (пераемніцай стала газэта «Віцебскі рабочы»).
1918 — скончылася Першая сусьветная вайна.
1975 — Ангола атрымала незалежнасьць ад Партугаліі.
1992 — Рэспубліка Беларусь усталявала дыпляматычныя зносіны з Ватыканам.
1999 — з Аршанскай калёніі выйшаў на свабоду двойчы Герой Сацыялістычнай працы Васіль Старавойтаў.
2004 — Літва першай з краінаў Эўразьвязу ратыфікавала ўстаўную дамову ЭЗ.
ТАКСАМА Ў ГЭТЫ ДЗЕНЬ
11 лістапада ў праваслаўных беларусаў — Настасься (у гэты дзень нашыя продкі пачыналі стрыгчы авечак), а ў каталікоў — Марцін, апякун млынароў. Яго імя носяць сотні сьвятыняў у Францыі ці Польшчы. Сьвяты Марцін зьяўляецца апекуном вайскоўцаў, краўцоў, бедных і жабракоў, а таксама хатняй жывёлы, асабліва коней і гусей. На сьвята ў яго гонар у многіх краінах гатуюць традыцыйную гусь. У Чэхіі лічыцца, што да Сьвятога Марціна гатовае маладое віно сёлетняга ўраджаю. Паводле народных прыкметаў, Марцін прыяжджае на «белым кані», г.зн. зь першым сьнегам.
У гэты дзень нарадзіліся:
1821 — нарадзіўся расейскі пісьменьнік беларускага паходжаньня Фёдар Дастаеўскі. «Продкі мае выйшлі зь літоўскіх балот», — пісаў аўтар «Братоў Карамазавых», маючы на ўвазе гняздо свайго роду ў мястэчку Дастоева на Піншчыне.
1903 — Аляксандар Ільінскі, беларускі актор, народны артыст Беларусі.
1909 — беларускі архітэктар Георгій Заборскі, аўтар сярод іншага будынкаў Музэя Якуба Коласа і Музэю Вялікай айчыннай вайны.
1929 — Леанід Сушчэня, беларускі вучоны заоляг і біёляг.
У гэты дзень памерлі:
1975 — Пётар Савачкін, беларускі гісторык.
2004 — Ясір Арафат, кіраўнік Палестынскай аўтаноміі.