Кіраўнік Ўкраіны наведаў Канаду перад візытам у Злучаныя Штаты, і пасьля выступу ў парлямэнце яго прывіталі прадстаўнікі дыяспар. Першай слова было дадзена старшыні Рады БНР Івонцы Сурвіле, якую Радыё Свабода папрасіла распавесьці пра сустрэчу.
Сурвіла: «Для ўкраінцаў гэта была вялікая падзея і думаю, што і для самога прэзыдэнта, якога прынялі вельмі цёпла. Зрабілі гэта вельмі ўрачыста, было шмат людзей, шмат сьцягоў перад парлямэнтам, і сярод іх — наш бел-чырвона-белы. Пасьля прамовы Парашэнкі ў парлямэнце прадстаўнікоў дыяспараў запрасілі сказаць пару слоў, між іншым, мяне таксама. Я прывітала яго ў Канадзе і падзякавала ўкраінскаму народу за змаганьне, якое важнае таксама для Беларусі. (тэст выступу сп. Сурвілы — ніжэй. — рэд.) Гаварыў прадстаўнік Эстоніі, вельмі добра выступіў прадстаўнік крымскіх татараў, які сказаў, што Крым будзе заўсёды ўкраінскім. Што я заўважыла — і гэта тычыцца ня толькі сустрэчы з Парашэнкам — ўкраінцы адсунулі ў бок усе свае спрэчкі і сваркі, і цяпер адчуваецца абсалютная згода і супрацоўніцтва між сабой».
Івонка Сурвіла таксама перадала прэзыдэнту Пятру Парашэнку нядаўнюю Заяву Рады БНР ў справе Ўкраіны.
Тэкст выступу Старшыні Рады БНР Івонкі Сурвілы на ўрачыстасьці з нагноды візыту прэзыдэнта Ўкраіны Пятра Парашэнкі:
Спадар Прэзыдэнт,
Я шчасьлівая Вітаць Вас у гэтай цудоўнай краіне ад імя маіх суродзічаў-беларусаў.
Ад імя Рады Беларускай Народнай Рэспублікі ў выгнаньні, хацела б выказаць нашую салідарнасць і нашу падтрымку народу, ураду і вайсковаму камандваньню Ўкраіны, якія абараняюць ня толькі сваю зямлю, але і нашыя агульныя каштоўнастьці ад брутальнага агрэсара.
Мы ўдзячныя Канадзе за падтрымку Ўкраіны і заклікамем міжнародную супольнасьць аказаць усю магчымую дапамогу гэтай гераічнай нацыі. Мы разумеем, што наша будучыня таксама залежыць і ад таго, ці вытрымае Ўкраіна выпрабаваньні. Мы дзякуем народу Ўкраіны і жадаем вам посьпехаў.
Жыве Беларусь!
Слава Ўкраіне!
