У Менску лівень
У Менску пайшоў спорны дождж, амаль залева.
Праз 10 хвілін чакаецца прылёт Уладзімера Пуціна, які з-за кепскага надвор’я можа спазьніцца.
Пуцін спазьняецца
У аэрапорт прыехаў беларускі прэм’ер Міхаіл Мясьніковіч — сустракаць расейскага прэзыдэнта Ўладзімера Пуціна. Пятра Парашэнку і Нурсултана Назарбаева сустракаў віцэ-прэм’ер Міхаіл Русы.
Але Мясьніковіч мусіць пачакаць, бо Пуцін спазьняецца, як мінімум на паўгадзіны. Гэта звычайная манэра Пуціна.
Лукашэнка — Парашэнку: Беларусь зацікаўлена ў нармалізацыі абстаноўкі ва Ўкраіне
«Гэта была ваша прапанова сабрацца без усялякага там навалу, без бухты-барахты прымаць рашэньні пасьля заключэньня пагадненьня аб асацыяцыі Ўкраіны з ЭЗ, разабрацца ў сытуацыі. Вось і ўвесь піяр. Гэта была прапанова прэзыдэнта Ўкраіны, вы мяне папрасілі давесьці гэта да маіх калег. Я быў выканаўцам. Я ўсё зрабіў для таго, каб давесьці да іх ваш пункт гледжаньня, і вось — адпаведная рэакцыя з боку членаў Мытнага саюза», — адзначыў Лукашэнка
Парашэнка спадзяецца прывезьці з Менску мір
«Калі нам сёньня з вамі і нашымі калегамі ўдасца дасягнуць пагадненьня, якое прынясе мір, гэта будзе знакавай падзеяй і ў нашых двухбаковых стасунках таксама», — адзначыў Парашэнка.
Пачалася сустрэча Пятра Парашэнкі з прэзыдэнта Казахстана Нурсултанам Назарбаевым
Пуцін і георгіеўская стужка
Георгіеўская стужка, якую выкарыстоўваюць як свой сымбаль сэпаратысты на Данбасе, была сёньня заўважаная ў аэрапорце на прадстаўніках атачэньня Ўладзімера Пуціна, які прыбыў у Менск на перамовы па сытуацыі ва Ўкраіне.
Праз некалькі хвілінаў пачнецца сустрэча ў фармаце 4+1 у Палацы незалежнасьці
Пуцін і Парашэнка паціснулі адзін аднаму рукі — перадаюць журналісты з прэс-цэнтра Палаца незалежасьці.
Назарбаеў выступіў за перамір’е
Прэзыдэнт Казахстана Нурсултан Назарбаеў прапанаваў абвесьціць перамір’е і арганізаваць дастаўку гуманітарнай дапамогі. Назарбаеў запрашае новы саміт па сытуацыі ва Ўкраіне ў Казахстан.
Пуцін палохае Ўкраіну
Уладзімер Пуцін заявіў, што Ўкраіна наўрад ці зможа эфэктыўна ўзаемадзейнічаць з краінамі Мытнага зьвязу, калі падпіша асацыяцыю зь Эўразьвязам:
«На наш погляд, было б мэтазгодна ня толькі захаваць, але і значна нарасьціць узаемадзеяньне (паміж Украінай і МЗ)... Аднак узьнікае пытаньне, ці можна ўсяго гэтага дасягнуць, калі рэальна запрацуе Пагадненьне аб асацыяцыі Ўкраіны з Эўразьвязам».